جناح اسپتال کراچی میں معدے اور آنتوں کے کینسر کی تشخیص کے لیے جدید اینڈوسکوپک الٹراساؤنڈ سہولت

کراچی کے جناح پوسٹ گریجویٹ میڈیکل سینٹر (جے پی ایم سی) میں نظام انہضام کے پیچیدہ امراض، بشمول معدے، آنتوں اور لبلبے کے کینسر کی تشخیص اور علاج کے لیے جدید اینڈوسکوپک الٹراساؤنڈ (ای یو ایس) کی سہولت شروع کر دی گئی ہے۔ اس اقدام سے صوبے کے سرکاری اسپتالوں میں اعلیٰ درجے کی تشخیصی سہولیات کی دستیابی میں اضافہ ہوگا۔

اسپتال حکام کے مطابق اس جدید ٹیکنالوجی کی مدد سے ایسے پیچیدہ تشخیصی اور علاج کے پروسیجرز بھی ممکن ہو سکیں گے جن پر نجی اسپتالوں میں تین سے چار لاکھ روپے تک کا خرچ آتا ہے۔ تاہم جناح اسپتال میں مستحق مریضوں کو یہ سہولت مفت فراہم کی جائے گی۔ اس سہولت کے آغاز کے بعد جے پی ایم سی سندھ کا دوسرا سرکاری اسپتال بن گیا ہے جہاں اینڈوسکوپک الٹراساؤنڈ دستیاب ہے۔

بتایا گیا ہے کہ کروڑوں روپے مالیت کی درآمدی مشین معروف دوا ساز ادارے گیٹز فارما نے جناح اسپتال کے شعبہ گیسٹروانٹرولوجی کی درخواست پر عطیہ کی ہے۔ اس مشین کے ذریعے معدے اور آنتوں کے اندرونی حصوں کے علاوہ لبلبے، جگر، صفراوی نالیوں اور لمف نوڈز کا تفصیلی معائنہ کیا جا سکے گا۔ جدید مشین سے رسولیوں اور کینسر کی تشخیص، متاثرہ حصوں سے بایوپسی کے لیے نمونے حاصل کرنے، لبلبے کے گرد جمع سیال کی نکاسی اور صفراوی نالیوں کی بعض رکاوٹوں کے علاج سمیت متعدد پیچیدہ پروسیجرز ممکن ہوں گے۔

جناح اسپتال کے ایگزیکٹو ڈائریکٹر ڈاکٹر خالد شیر نے کہا کہ معدے، آنتوں اور لبلبے کے کینسر میں بروقت تشخیص انتہائی اہم ہے، کیونکہ بہت سے مریض اسپتال اس وقت پہنچتے ہیں جب بیماری کافی حد تک پھیل چکی ہوتی ہے۔ ان کے مطابق جدید ٹیکنالوجی کی دستیابی سے بیماری کی درست تشخیص میں مدد ملے گی اور مریضوں کے علاج میں تاخیر کم ہو سکے گی۔

شعبہ گیسٹروانٹرولوجی کی سربراہ ڈاکٹر نازش بٹ نے کہا کہ روایتی اینڈوسکوپی اور دیگر تشخیصی ٹیسٹوں سے بعض رسولیوں کی مکمل نوعیت معلوم کرنا ممکن نہیں ہوتا، تاہم اینڈوسکوپک الٹراساؤنڈ کے ذریعے متاثرہ حصے کا تفصیلی معائنہ اور درست مقام سے بایوپسی کی جا سکتی ہے۔ انہوں نے کہا کہ یہ سہولت بالخصوص لبلبے کی رسولیوں، معدے اور آنتوں کے کینسر اور مشتبہ لمف نوڈز کی تشخیص میں اہم کردار ادا کرے گی۔

ان کا مزید کہنا تھا کہ کراچی کے علاوہ سندھ کے دور دراز اضلاع اور بلوچستان سے بھی مریض علاج کے لیے جناح اسپتال آتے ہیں، اس لیے مہنگے تشخیصی پروسیجرز کی مفت فراہمی سے غریب اور مستحق مریضوں کو نمایاں سہولت ملے گی۔ گیٹز فارما کے ڈپٹی منیجنگ ڈائریکٹر ذیشان احمد نے کہا کہ صحت کی جدید سہولیات تک عوام کی رسائی بہتر بنانا ادارے کی سماجی ذمہ داری ہے، اسی مقصد کے تحت جناح اسپتال کو یہ مشین فراہم کی گئی ہے۔