پٹرولیم مصنوعات کی عالمی قیمتیں گرنے پر عوام کو فوری ریلیف دیا جائے گا، وزیر پٹرولیم

وفاقی وزیر پٹرولیم علی پرویز ملک نے کہا ہے کہ عالمی منڈی میں پٹرولیم مصنوعات کی قیمتوں میں کمی واقع ہونے کی صورت میں عوام کو فوری ریلیف فراہم کیا جائے گا۔ انہوں نے موسم سرما میں توانائی کے غیر ضروری استعمال سے گریز اور بچت کو فروغ دینے پر زور دیتے ہوئے کہا کہ توانائی کے استعمال میں معمولی احتیاط بھی قیمتی زر مبادلہ کی بچت کا باعث بن سکتی ہے۔

ان خیالات کا اظہار انہوں نے اتوار کو کونجی یونیورسٹی کے کانووکیشن سے خطاب کرتے ہوئے کیا۔ وزیر پٹرولیم نے کہا کہ ایران اور امریکا کے درمیان کشیدگی کے باعث عالمی منڈی میں پٹرولیم مصنوعات کی قیمتیں متاثر ہوئیں، تاہم حکومت کی کوشش ہے کہ عالمی سطح پر قیمتیں گرنے کا فائدہ براہ راست صارفین تک پہنچے۔

انہوں نے بتایا کہ حکومت نے مقبول فیصلوں کے بجائے ملکی زر مبادئے کے تحفظ کو ترجیح دی اور پٹرولیم قیمتوں میں اضافے کے اثرات کم کرنے کے لیے ٹارگٹڈ سبسڈی کا طریقہ اختیار کیا۔ اس پالیسی کے تحت وسائل ان افراد پر مرکوز کیے گئے جو اس کے سب سے زیادہ مستحق تھے، جبکہ آبنائے ہرمز کے بحران کا دیگر ممالک کے مقابلے میں کم نقصان کے ساتھ سامنا کیا گیا۔ ان کا کہنا تھا کہ 12 سے 13 ملین مستحق افراد کو جنگ سے پہلے کی قیمتوں پر سبسڈی والا پٹرول فراہم کیا جا رہا ہے۔

وزیر پٹرولیم نے کہا کہ گزشتہ چھ ماہ کے دوران آبنائے ہرمز کی صورتحال نے تمام ممالک کو متاثر کیا۔ مختلف ملکوں کو اپنی معیشتیں چلانے کے لیے مہنگے تیل، گیس، ایل پی جی اور دیگر ایندھن کی خریداری کے لیے قیمتی زر مبادلہ کے حصول میں دشواری کا سامنا کرنا پڑا، جبکہ عوام کو بھی اپنے خاندانوں کے حوالے سے مشکل فیصلے کرنے پڑے۔ انہوں نے کہا کہ یہ بحران اپنی شدت اور وسعت کے اعتبار سے غیر معمولی رہا اور اس کے تسلسل نے مختلف ممالک کی معاشی استعداد کو آزمائش سے گزارا۔

علی پرویز ملک نے کہا کہ پاکستان نے وہ معاشی استحکام برقرار رکھا ہے جس کے حصول کے لیے سب نے محنت کی۔ انہوں نے بتایا کہ ملک میں ایندھن کی قیمتوں کے تعین کے طریقہ کار میں شفافیت لائی گئی ہے اور تمام تفصیلات عوام کے سامنے رکھی جا رہی ہیں، تاکہ عالمی منڈی میں قیمتوں میں بہتری آنے پر اس کا فائدہ خود بخود عوام کے گھروں تک پہنچ سکے۔

واضح رہے کہ حکومت کی جانب سے توانائی کی بچت اور ٹارگٹڈ سبسڈی پر مبنی پالیسی کا مقصد قیمتی زرمبادلہ کے ذخائر کا تحفظ اور کمزور طبقات تک ریلیف کی رسائی یقینی بنانا ہے۔ ماہرین کے مطابق عالمی تیل کی قیمتوں میں استحکام اور آبنائے ہرمز کی صورتحال میں بہتری پاکستان کی معیشت کے لیے مثبت اشارہ ثابت ہو سکتی ہے۔