اسلام آباد کا کشمیر چوک انڈر پاس ریکارڈ 27 روز میں مکمل، آج سے ٹریفک کے لیے کھول دیا جائے گا

وفاقی دارالحکومت اسلام آباد میں فلاح عامہ کے ایک اور منصوبے پر کام ریکارڈ 27 روز میں مکمل کر لیا گیا ہے۔ کشمیر چوک انڈر پاس کو کل جمعرات سے عام ٹریفک کے لیے کھول دیا جائے گا، جس سے شہر کے اس مصروف ترین علاقے میں رش اور دیرینہ ٹریفک مسائل میں نمایاں کمی متوقع ہے۔

وفاقی وزیر داخلہ محسن نقوی نے رات گئے کشمیر چوک انڈر پاس کا دورہ کیا اور منصوبے پر جاری فنشنگ ورک کا تفصیلی جائزہ لیا۔ اس موقع پر انہوں نے تعمیراتی کام کی رفتار اور معیار کو سراہا اور ورکرز کی دن رات محنت کوخراج تحسین پیش کیا۔

محسن نقوی نے ورکرز سے ملاقات کے دوران کہا کہ یہ کارکن اس منصوبے کے اصل ہیروز ہیں جنہوں نے شب و روز انتھک محنت کرکے اسے مقررہ وقت سے پہلے مکمل کیا۔ انہوں نے کارکنوں کو شاباش بھی دی اور ان کی محنت کو عوامی سہولت کا اہم ستون قرار دیا۔

منصوبے کے گرد و نواح کو سرسبز و شاداب بنانے کے لیے 6 ہزار نئے درخت اور پودے بھی لگائے گئے ہیں، جس سے علاقے کے ماحول اور منظر نامے کو بہتر بنانے میں مدد ملے گی۔ اس اقدام کو شہری منصوبہ بندی میں ماحولیاتی پہلوؤں کی اہمیت کا عکاس قرار دیا جا رہا ہے۔

انڈر پاس کی تعمیر ریکارڈ مدت میں مکمل ہونا حکومت کی جانب سے بنیادی ڈھانچے کے منصوبوں کی تیز رفتار تکمیل کی پالیسی کی عکاسی کرتا ہے۔ ماہرین کے مطابق اس سے نہ صرف شہریوں کا سفر آسان ہوگا بلکہ مقامی معاشی سرگرمیوں کو بھی فروغ ملے گا۔

واضح رہے کہ کشمیر چوک اسلام آباد کے مصروف ترین تجارتی اور آمدورفت کے مراکز میں شمار ہوتا ہے، جہاں طویل عرصے سے ٹریفک کی شدید رش رہتی تھی۔ انڈر پاس کی تکمیل سے اس علاقے سے گزرنے والے ہزاروں شہریوں کو روزانہ کی بنیاد پر سہولت ملنے کی توقع ہے۔