جے ایس بینک کی 'زندگی' ایپ: بیرونِ ملک مقیم پاکستانیوں کے لیے پاکستانی سِم کے بغیر اکاؤنٹ کھولنے کی سہولت

جے ایس بینک کے ڈیجیٹل پلیٹ فارم زندگی نے بیرونِ ملک مقیم پاکستانیوں کے لیے 'زندگی اوورسیز اکاؤنٹس' کی سہولت متعارف کرادی ہے۔ اس اقدام کا مقصد بیرونِ ملک مقیم پاکستانیوں کو پاکستانی موبائل نمبر یا کسی بینک برانچ میں حاضر ہوئے بغیر ڈیجیٹل طریقے سے پاکستان میں بینک اکاؤنٹ کھولنے اور اسے چلانے کی سہولت فراہم کرنا ہے۔

کمپنی کے مطابق اہل صارفین اپنے بین الاقوامی واٹس ایپ نمبر کے ذریعے رجسٹریشن کروا کر IBAN والا باقاعدہ بینک اکاؤنٹ کھول سکیں گے۔ اس اکاؤنٹ کے ذریعے وہ اہلِ خانہ کی مالی معاونت، یوٹیلیٹی بلز کی ادائیگی، پاکستان میں رقوم کی منتقلی اور دیگر مالی معاملات انجام دے سکیں گے۔

یہ سہولت ان اہل پاکستانیوں کے لیے دستیاب ہے جو پاکستان اوریجن کارڈ، نائیکوپ یا کمپیوٹرائزڈ قومی شناختی کارڈ رکھتے ہیں۔ صارفین متعلقہ ضوابط کے مطابق نان ریزیڈنٹ اکاؤنٹ ریپیٹریبل یا نان ریزیڈنٹ اکاؤنٹ نان ریپیٹریبل میں سے کسی ایک قسم کا انتخاب کر سکیں گے۔

زندگی کے شریک بانی اور چیف آفیسر نعمان اظہر نے کہا کہ اوورسیز اکاؤنٹس کا اجرا ہر پاکستانی کے لیے بینکاری کو آسان اور قابلِ رسائی بنانے کے ادارے کے وژن کا حصہ ہے۔ ان کے بقول جغرافیائی سرحدیں مالی خدمات تک رسائی میں رکاوٹ نہیں بننی چاہئیں، اور یہ سہولت بیرونِ ملک مقیم پاکستانیوں کو وطن سے مالی طور پر منسلک رکھنے میں مدد دے گی۔

واضح رہے کہ بیرونِ ملک مقیم پاکستانیوں کی جانب سے ترسیلاتِ زر پاکستان کی معیشت کا اہم ستون ہیں۔ ایسی ڈیجیٹل بینکاری سہولیات کے فروغ سے نہ صرف ترسیلاتِ زر کی روانی میں اضافہ متوقع ہے بلکہ بیرونِ ملک مقیم پاکستانیوں کو وطن میں مالی معاملات نمٹانے کے لیے درپیش مشکلات بھی کم ہوں گی۔