پاکستان کو مسلسل چار بین الاقوامی اسکواش ٹورنامنٹس کی میزبانی مل گئی، مجموعی انعامی رقم 4 لاکھ 39 ہزار ڈالر
اسلام آباد میں ایشین ٹیم اسکواش چیمپئن شپ کے بعد پاکستان مسلسل چار بین الاقوامی اسکواش مقابلوں کی میزبانی کرے گا، جن کی مجموعی انعامی رقم 4 لاکھ 39 ہزار ڈالر ہے اور تین ٹورنامنٹس کراچی میں کھیلے جائیں گے۔
پاکستان میں بین الاقوامی اسکواش کی بحالی کا سفر تیز ہو گیا ہے۔ اسلام آباد میں جاری ایشین ٹیم اسکواش چیمپئن شپ کے ساتھ ہی ملک کو مسلسل چار بین الاقوامی اسکواش مقابلوں کی میزبانی کا اعزاز مل گیا ہے، جن کی مجموعی انعامی رقم 4 لاکھ 39 ہزار ڈالر ہے۔ ان مقابلوں میں دنیا بھر کے معروف مرد اور خواتین کھلاڑی اپنی صلاحیتوں کا مظاہرہ کریں گے۔
پروفیشنل اسکواش ایسوسی ایشن کے سالانہ کیلنڈر میں شامل ان چار مقابلوں میں سے تین کا انعقاد کراچی میں ہو گا جبکہ ایک ٹورنامنٹ اسلام آباد میں کھیلا جائے گا۔ اس سلسلے کا آغاز سلور کیٹیگری کی چیف آف ایئر اسٹاف انٹرنیشنل اسکواش چیمپئن شپ 2026 سے ہو گا، جو 24 سے 28 نومبر تک اسلام آباد میں ہو گی۔ 40 ہزار ڈالر انعامی رقم والی اس چیمپئن شپ میں صرف مردوں کے مقابلے شامل ہیں۔
اس ٹورنامنٹ میں پاکستان کے عالمی انڈر23 چیمپئن نور زمان ٹاپ سیڈ ہوں گے، جنہیں نئی بین الاقوامی رینکنگ میں تین درجے ترقی کے بعد 25 ویں پوزیشن حاصل ہوئی ہے۔ پاکستان کے اشعب عرفان کو سیڈ 4 دیا گیا ہے، جن کی نئی رینکنگ میں سات درجوں کی بہتری آئی ہے، جبکہ عالمی رینکنگ میں 68 ویں نمبر پر پہنچنے والے محمد عاصم خان سیڈ 7 ہوں گے۔ چیمپئن شپ میں ناصر اقبال بھی ایکشن میں نظر آئیں گے۔
کراچی میں کھیلے جانے والے تین مقابلوں کی مجموعی انعامی رقم 3 لاکھ 99 ہزار ڈالر ہے۔ اس سلسلے کا پہلا ٹورنامنٹ 18 ہزار ڈالر انعامی رقم والی چیف آف نیول اسٹاف چیمپئن شپ ہو گا، جو یکم سے 5 دسمبر تک پی این روشن خان اور جہانگیر خان اسکواش کمپلیکس میں شیڈول ہے اور اس میں ایک ہزار ڈالر کا ویمن پی ایس اے ایونٹ بھی شامل ہو گا۔ اس کے بعد 6 سے 10 دسمبر تک سندھ اوپن انٹرنیشنل اسکواش چیمپئن شپ کریک کلب میں طے ہے۔
ایک لاکھ 30 ہزار ڈالر انعامی رقم والی سندھ اوپن میں مردوں اور خواتین کے مقابلوں کے لیے مساوی رقم مختص کی گئی ہے۔ مینز ایونٹ میں پاکستان کے واحد کھلاڑی نور زمان ہوں گے جبکہ عالمی نمبر 17 مصری کھلاڑی یوسف سلمان ٹاپ سیڈ قرار پائے ہیں۔ ویمن ایونٹ میں مصر کی عالمی نمبر 14 سلمیٰ ہانی ٹاپ سیڈ اور ان کی ہم وطن عالمی نمبر 19 ندا عباس سیڈ 2 ہوں گی۔
برانز کیٹیگری کی چیمپئن شپ کے بعد 5 سے 10 جنوری 2027 تک گولڈ کیٹیگری کی کراچی اوپن چیمپئن شپ کھیلی جائے گی، جس میں ڈھائی لاکھ ڈالر کی پرکشش انعامی رقم رکھی گئی ہے۔ مینز ایونٹ کے لیے ایک لاکھ 25 ہزار ڈالر مقرر کیے گئے ہیں اور اتنی ہی رقم ویمن ایونٹ میں شریک 32 کھلاڑیوں میں تقسیم کی جائے گی۔ ماہرین کے مطابق ان مقابلوں سے مقامی کھلاڑیوں کا حوصلہ بلند ہو گا اور عالمی کھلاڑیوں کی پاکستان آمد ملک کے مثبت بین الاقوامی تاثر اور اسکواش کی بحالی میں معاون ثابت ہو گی۔
