پاکستان کا قیمتی پتھروں کی برآمدات 5 سال میں ایک ارب ڈالر تک بڑھانے کا ہدف
وفاقی حکومت نے قیمتی اور نیم قیمتی پتھروں کی برآمدات کو اگلے پانچ سال میں ایک ارب ڈالر تک لے جانے کا ہدف مقرر کیا ہے، جس کے لیے ویلیو ایڈیشن، عالمی معیار کی سرٹیفکیشن اور جدید کان کنی پر توجہ دی جا رہی ہے۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
وفاقی حکومت نے قیمتی اور نیم قیمتی پتھروں کی برآمدات کو اگلے پانچ سالوں میں ایک ارب ڈالر تک بڑھانے کا ہدف مقرر کیا ہے۔ اس مقصد کے حصول کے لیے مقامی سطح پر ویلیو ایڈیشن، عالمی معیار کے مطابق سرٹیفکیشن، جدید کان کنی کی تکنیکوں اور پاکستانی برانڈ کے فروغ پر خصوصی توجہ دی جا رہی ہے۔
یہ بات وزیرِاعظم کے معاونِ خصوصی برائے توانائی لیفٹیننٹ جنرل (ر) محمد ظفر اقبال نے اسلام آباد میں چار روزہ بین الاقوامی ورکشاپ بعنوان 'مقامی قیمتی پتھروں کی حقیقی قدر سے استفادہ' کی افتتاحی تقریب سے خطاب کرتے ہوئے کہی۔ یہ ورکشاپ 17 سے 20 نومبر تک جاری رہے گی، جس کا انعقاد ایشیائی پیداواری تنظیم (اے پی او)، قومی پیداواری تنظیم (این پی او) پاکستان اور پاکستان جیمز اینڈ جیولری ڈویلپمنٹ کمپنی (پی جی جے ڈی سی) مشترکہ طور پر کر رہے ہیں۔ اس موقع پر ایک روزہ قیمتی پتھروں کی نمائش کا بھی افتتاح کیا گیا، جس میں پاکستان کے مقامی قیمتی اور نیم قیمتی پتھروں کی اقسام، معیار اور مقامی سطح پر تراش خراش، پالش اور جدید طریقوں سے ویلیو ایڈیشن کی صلاحیت کو اجاگر کیا گیا۔
معاونِ خصوصی نے بتایا کہ پاکستان قدرتی وسائل اور قیمتی پتھروں کے وسیع ذخائر سے مالا مال ہے، جن کے بڑے ذخائر گلگت بلتستان، خیبر پختونخوا اور آزاد جموں و کشمیر میں موجود ہیں، جبکہ بلوچستان میں بھی اس شعبے میں نمایاں استعداد موجود ہے۔ انہوں نے کہا کہ ملک میں قیمتی پتھروں کے ذخائر کا تخمینہ تقریباً 450 ارب ڈالر لگایا گیا ہے، تاہم ان کی سالانہ باقاعدہ برآمدات محض 5.8 ملین ڈالر تک محدود ہیں۔
انہوں نے مزید کہا کہ پاکستان میں پانچ ہزار سے زائد کمپنیاں زمرد، پیریڈوٹ، یاقوت، پکھراج اور ایکوا میرین سمیت 30 سے زائد اقسام کے پتھروں کی پروسیسنگ سے وابستہ ہیں، تاہم روایتی کان کنی، محدود ویلیو ایڈیشن اور معیاری سرٹیفکیشن کے فقدان کے باعث یہ شعبہ اپنی حقیقی صلاحیت کے مطابق ترقی نہیں کر سکا۔
لیفٹیننٹ جنرل (ر) محمد ظفر اقبال نے کہا کہ حکومت پاکستان قیمتی پتھروں کی صلاحیت سے استفادہ کے لیے قومی پالیسی 2026-2030 کے تحت اصلاحات پر عمل پیرا ہے، جس کا مقصد پانچ سال میں برآمدات کو ایک ارب ڈالر تک پہنچانا ہے۔ اس سلسلے میں بین الاقوامی معیار کا سرٹیفکیشن نظام، شعبے کی ترقی اور سرمایہ کاری کے لیے مخصوص اتھارٹی، نیشنل وارنٹی آفس کا قیام، ارضیاتی نقشہ سازی، جدید کان کنی کی ٹیکنالوجی، نجی شعبے کی تربیت اور مراکزِ امتیاز کے قیام جیسے اقدامات شامل ہیں۔
ان کا کہنا تھا کہ مقامی سطح پر پتھروں کی تراش خراش، پروسیسنگ اور ویلیو ایڈیشن کو فروغ دے کر عالمی منڈیوں میں پاکستانی مصنوعات کی مسابقتی صلاحیت بڑھائی جا سکتی ہے۔ حکومت اس شعبے کو قومی معیشت میں مؤثر طور پر ضم کرنے اور برانڈ پاکستان کو عالمی سطح پر متعارف کرانے کے لیے اقدامات کر رہی ہے۔ اس موقع پر ایشیائی پیداواری تنظیم جاپان کے پروگرام آفیسر اور اے پی او کوآرڈینیٹر نوبوتسوگو میاما نے کہا کہ اے پی او پاکستان میں مقامی قیمتی پتھروں کی استعداد سے بھرپور استفادے کے لیے علم کے تبادلے، استعداد کار میں اضافے اور علاقائی تعاون کے ذریعے معاونت فراہم کر رہی ہے۔
اب تک کی کہانی گلگت بلتستان
- ایس ای سی پی کا خواتین کے لیے چھوٹے کاروباری قرضوں اور مالی آگاہی کو فروغ دینے کا اعلان
- منرلز انویسٹمنٹ فورم 2026 کا آغاز: اسحاق ڈار کا عالمی سرمایہ کاروں کو ہر ممکن سہولت کی یقین دہانی
- گلگت بلتستان: یاسین میں مسافر گاڑی دریا میں گرنے سے 10 افراد جاں بحق، 2 زخمی
- حویلیاں انٹرچینج کے قریب بس اور ڈمپر میں تصادم، 8 افراد جاں بحق، 17 زخمی










