لاہور دنیا کا آلودہ ترین شہر قرار، ایئر کوالٹی انڈیکس 509 تک پہنچ گیا

لاہور کی فضا خطرناک حد تک آلودہ ہو چکی ہے اور شہر دنیا بھر میں آلودگی کے لحاظ سے پہلے نمبر پر آ گیا ہے۔ عالمی ادارے آئی کیو ایئر کے تازہ اعداد و شمار کے مطابق لاہور کا ایئر کوالٹی انڈیکس 509 ریکارڈ کیا گیا، جو انسانی صحت کے لیے انتہائی مضر سطح سمجھی جاتی ہے۔

آلودہ ترین شہروں کی عالمی فہرست میں بھارت کا دارالحکومت نئی دہلی 221 پوائنٹس کے ساتھ دوسرے اور مصر کا دارالحکومت قاہرہ 210 پوائنٹس کے ساتھ تیسرے نمبر پر ہے، جبکہ لاہور ان دونوں شہروں سے کہیں زیادہ آلودہ رہا۔

صوبہ پنجاب کے دیگر شہروں کی صورتحال بھی تشویشناک ہے۔ پنجاب ایئر کوالٹی انڈیکس کے مطابق گوجرانوالہ 500 پوائنٹس کے ساتھ صوبے کا آلودہ ترین شہر قرار پایا، جبکہ ننکانہ صاحب بھی 500 پوائنٹس کے ساتھ دوسرے نمبر پر رہا۔ لاہور 449 پوائنٹس کے ساتھ تیسرے، حافظ آباد 386 پوائنٹس کے ساتھ چوتھے اور وزیرآباد 381 پوائنٹس کے ساتھ پانچویں نمبر پر آیا۔

لاہور کے متعدد علاقوں میں فضائی آلودگی انتہائی خطرناک سطح پر پہنچ گئی ہے۔ برکی روڈ، شاہدرہ، کاہنہ نو، ملتان روڈ، ڈی ایچ اے فیز 6، پنجاب یونیورسٹی، سفاری پارک، جی ٹی روڈ اور گلبرگ تھری میں ایئر کوالٹی انڈیکس 500 تک ریکارڈ کیا گیا۔

فضائی آلودگی کی اس بلند سطح نے شہریوں کی صحت کے حوالے سے خدشات بڑھا دیے ہیں۔ ماہرین کے مطابق اس صورتحال میں بچوں، بزرگوں اور سانس کے امراض میں مبتلا افراد کو سب سے زیادہ خطرہ لاحق ہے، کیونکہ آلودہ فضا میں طویل وقت تک سانس لینے سے سانس اور دل کی بیماریوں کے امکانات بڑھ جاتے ہیں۔

شہریوں سے کہا گیا ہے کہ وہ غیر ضروری طور پر باہر نکلنے سے گریز کریں اور ماسک کا استعمال کریں۔ دوسری جانب ماہرین ماحولیات نے حکام پر زور دیا ہے کہ فضائی آلودگی کے اسباب، جن میں گاڑیوں کا دھواں، صنعتی اخراج اور فصلوں کی باقیات کو جلانا شامل ہیں، پر فوری اور مؤثر اقدامات کیے جائیں تاکہ شہریوں کو صحت مند ماحول فراہم کیا جا سکے۔