لاہور ٹریفک پولیس کا ای چالان نادہندہ موٹرسائیکل سوار گرفتار، مجموعی جرمانہ 2 لاکھ 29 ہزار روپے

لاہور ٹریفک پولیس نے شہر میں ای چالان نادہندگان کے خلاف کارروائی جاری رکھتے ہوئے ایک ایسے شہری کو حراست میں لے لیا ہے جس کے نام پر رجسٹرڈ دو موٹرسائیکلوں کے ذریعے مجموعی طور پر 124 مرتبہ ٹریفک قوانین کی خلاف ورزی کی گئی۔ پٹرولنگ افسر عدنان نے بند روڈ پر کارروائی کے دوران ملزم کو پکڑا۔

ٹریفک پولیس کے مطابق شہری کے نام پر رجسٹرڈ دونوں موٹرسائیکلوں کی ایک پر ایک لاکھ 64 ہزار 800 روپے جبکہ دوسری پر 64 ہزار 200 روپے جرمانہ واجب الادا ہے، جس سے مجموعی واجب الادا رقم 2 لاکھ 29 ہزار روپے بنتی ہے۔ خلاف ورزیوں کی تفصیل کے مطابق ان موٹرسائیکلوں سے 109 مرتبہ بغیر ہیلمٹ سفر کیا گیا جبکہ 15 مرتبہ ٹریفک سگنل کی خلاف ورزی کی گئی۔

لاہور ٹریفک پولیس کے مطابق شہر بھر میں نصب اے این پی آر کیمروں کے ذریعے 20 سے زائد اقسام کی ٹریفک خلاف ورزیوں پر ای چالان جاری کیے جا رہے ہیں۔ ای چالان نادہندگان کے خلاف کارروائیوں کے سلسلے میں سرکاری محکموں کو بھی شامل کیا جا رہا ہے اور متعلقہ اداروں کو کلیئرنس کے لیے مراسلے ارسال کیے گئے ہیں۔

سی ٹی او لاہور سید عبدالرحیم شیرازی نے کہا ہے کہ منظم ٹریفک کے حصول کے لیے ای چالان نادہندگان کے خلاف کریک ڈاؤن جاری رہے گا، جبکہ نمبر پلیٹس سے چھیڑ چھاڑ کرنے والوں کے خلاف بھی بلاامتیاز کارروائی کی جا رہی ہے۔ انہوں نے شہریوں سے اپیل کی کہ وہ ٹریفک قوانین کی پابندی کریں تاکہ شہر میں حادثات اور قانون شکنی کو روکا جا سکے۔

واضح رہے کہ لاہور میں ای چالان نظام کے تحت کیمروں کی مدد سے خودکار طور پر خلاف ورزیوں کی نشاندہی کی جاتی ہے اور جرمانے متعلقہ گاڑی کے مالک کے نام جاری کیے جاتے ہیں۔ ٹریفک حکام کے مطابق یہ اقدام شہریوں میں قانون کی پاسداری کو یقینی بنانے اور ٹریفک کے بہاؤ کو منظم کرنے کی کوششوں کا حصہ ہے۔