نوکیا 2360 فلپ موبائل متعارف؛ بزرگ شہریوں اور اسکول جانے والے بچوں کے لیے خصوصی فیچرز

موبائل فون بنانے والی کمپنی ایچ ایم ڈی نے فلپائن میں نوکیا کے نئے فلپ موبائل فون نوکیا 2360 متعارف کروا دیا ہے۔ اس ماڈل کو خاص طور پر بزرگ شہریوں اور اسکول جانے والے بچوں کی ضروریات کو سامنے رکھتے ہوئے ڈیزائن کیا گیا ہے، تاکہ سادہ اور آسان رابطے کو ترجیح دینے والے صارفین کو ایک قابلِ اعتماد ڈیوائس فراہم کی جا سکے۔

فون میں 2.8 انچ کی اندرونی ڈسپلے اسکرین اور 1.77 انچ کی بیرونی اسکرین دی گئی ہے۔ اس کے علاوہ 1450 ایم اے ایچ کی قابلِ تبدیل بیٹری، کیو وی جی اے کیمرا، 3.5 ملی میٹر ہیڈفون جیک، ایف ایم ریڈیو اور لاؤڈ اسپیکر بھی موجود ہیں، جبکہ اندرونی اسٹوریج صرف 4 ایم بی ہے۔ فون کلیم شیل ڈیزائن کے ساتھ پیش کیا گیا ہے۔

اس موبائل کی نمایاں خصوصیات میں سے ایک فیملی اسسٹ ہے، جس کے ذریعے خاندان کے نامزد افراد دور بیٹھے ہوئے بھی فون کے کانٹیکٹس کا انتظام کر سکتے ہیں، آواز کی سطح میں تبدیلی لا سکتے ہیں اور روزانہ کی یاد دہانیاں سیٹ کر سکتے ہیں۔ یہ سہولت بزرگ افراد اور بچوں کے لیے خاص طور پر مفید ہے، کیونکہ ان کے اہلِ خانہ ان کی ڈیوائس کو دور سے سنبھال سکتے ہیں۔

فون میں ایک مخصوص ایس او ایس بٹن بھی دیا گیا ہے، جسے دبانے پر خودکار طور پر بنیادی ہنگامی رابطہ نمبر پر کال کی جاتی ہے، جبکہ پہلے سے محفوظ کیے گئے پانچ نمبروں تک ہنگامی الرٹس بھی بھیجے جا سکتے ہیں۔ اس طرح ہنگامی صورتِ حال میں صارف کے لیے فوری مدد حاصل کرنا آسان ہو جاتا ہے۔

واضح رہے کہ یہ فون صرف ٹو جی نیٹ ورک کو سپورٹ کرتا ہے اور اس میں جدید فور جی یا فائیو جی کنیکٹیویٹی موجود نہیں۔ اس لیے یہ ڈیوائس ان صارفین کے لیے ہے جو اسمارٹ فونز کے بجائے سادہ اور آسان رابطے کو ترجیح دیتے ہیں، جبکہ اس کی توجہ بزرگ شہریوں اور اسکول کے طلبہ پر مرکوز ہے۔