پاکستان نے جی 24 کی سربراہی سنبھال لی، وزیر خزانہ کا عالمی مالیاتی اصلاحات پر زور

وزارت خزانہ نے اعلان کیا ہے کہ پاکستان نے 24 رکنی بین الحکومتی گروپ جی 24 کی سربراہی سنبھال لی ہے۔ یہ گروپ ترقی پذیر اور کم آمدنی والی معیشتوں کے مشترکہ مفادات کی نمائندگی کرتا ہے اور عالمی مالیاتی و اقتصادی امور میں ان کی اجتماعی آواز بلند کرنے کا فورم ہے۔ وزارت نے سماجی رابطے کی ویب سائٹ ایکس پر جاری بیان میں کہا کہ پاکستان اس ذمہ داری کے ذریعے ترقی پذیر ممالک کی آواز کو مزید مضبوط بنانے اور ایک زیادہ جوابدہ، منصفانہ اور ترقی پر مبنی بین الاقوامی مالیاتی نظام کے قیام کے اپنے عزم کا اعادہ کرتا ہے۔

وفاقی وزیر خزانہ و محصولات سینیٹر محمد اورنگزیب نے اس ذمہ داری کو ایک اہم موقع قرار دیتے ہوئے کہا کہ پاکستان نئے بین الاقوامی تعاون کو فروغ دے گا اور کثیر الجہتی اداروں کو مضبوط بنانے پر کام کرے گا تاکہ موسمیاتی جھٹکوں، ترقیاتی مالیاتی فرق اور عالمی معاشی عدم توازن جیسے چیلنجز سے مؤثر طریقے سے نمٹا جا سکے۔ انہوں نے واضح کیا کہ ترقی پذیر معیشتوں کا مستقبل عالمی معیشت کے مستقبل سے الگ نہیں بلکہ اس کے مرکز میں ہے۔

وزیر خزانہ نے اپنی سربراہی کے لیے تین اسٹریٹجک ترجیحات کا خاکہ پیش کیا۔ پہلی ترجیح یہ ہے کہ ترقی کو عالمی اقتصادی پالیسی سازی کے مرکز میں رکھا جائے، جہاں میکرو اکنامک استحکام کو سرمایہ کاری، پیداواری صلاحیت، روزگار اور مشترکہ خوشحالی کی بنیاد کے طور پر دیکھا جائے۔ اس سے ترقی پذیر اور کم آمدنی والی معیشتیں بحران سے نکل کر پائیدار ترقی کی راہ پر گامزن ہو سکتی ہیں۔ دوسری ترجیح زیادہ جامع اور نمائندہ اداروں کے ذریعے کثیر الجہتی فریم ورک کو مضبوط بنانا ہے۔

اس حوالے سے پاکستان زیادہ منصفانہ طرز حکمرانی، فیصلہ سازی میں بامعنی شرکت اور عالمی بینک و بین الاقوامی مالیاتی فنڈ جیسے بریٹن ووڈز اداروں کی جانب سے اپنے اراکین کی بدلتی ہوئی ضروریات اور حقائق کے مطابق زیادہ ردعمل کی وکالت کرے گا۔ تیسری ترجیح ترقی پر مبنی بین الاقوامی مالیاتی فن تعمیر کو فروغ دینا ہے، جس میں ترقیاتی فنانسنگ کی بروقت فراہمی، قرضوں کے پائیدار حل، مضبوط عالمی مالیاتی حفاظتی لائحہ عمل، موسمیاتی لچک اور سرکاری و نجی سرمائے کا زیادہ سے زیادہ متحرک ہونا شامل ہے۔

سینیٹر محمد اورنگزیب نے زور دیا کہ ہمارا مقصد اس بات کو یقینی بنانا ہے کہ ترقی پذیر معیشتوں کی بے پناہ صلاحیت کو ایسے بین الاقوامی مالیاتی ڈھانچے کی وجہ سے محدود نہ کیا جائے جو بدلتی ہوئی دنیا کے تقاضوں کو پوری طرح پورا نہیں کرتا۔ انہوں نے پاکستان کے معاشی استحکام، اصلاحات اور مشکلات سے نمٹنے کے تجربے کا حوالہ دیتے ہوئے کہا کہ مالی استحکام کو طویل مدتی ترقیاتی اہداف سے ہم آہنگ کرنا ضروری ہے تاکہ اصلاحات کے عمل سے گزرنے والی معیشتوں کو پائیدار ترقی کے لیے درکار مالی وسائل اور پالیسی سازی کی گنجائش میسر رہے۔

وزیر خزانہ نے کہا کہ پاکستان کی سربراہی جی 24 کے مشاورت، اتفاق رائے اور اجتماعی وکالت کے دیرینہ اصولوں کے مطابق ہوگی۔ اس سلسلے میں افریقہ، ایشیا، لاطینی امریکا اور کیریبین کے رکن ممالک کے ساتھ ساتھ آئی ایم ایف، عالمی بینک اور دیگر بین الاقوامی شراکت داروں کے ساتھ قریبی تعاون کیا جائے گا تاکہ مشترکہ ترجیحات کو ٹھوس نتائج میں تبدیل کیا جا سکے۔ انہوں نے سبکدوش ہونے والے چیئر کی حیثیت سے نائجیریا کی قیادت کو بھی سراہا اور گروپ کی اب تک کی پیش رفت کو مزید آگے بڑھانے کے عزم کا اظہار کیا۔

انہوں نے اس بات پر بھی زور دیا کہ اجتماعی قیادت کی افادیت کا اندازہ ٹھوس ترقیاتی نتائج کی بنیاد پر ہونا چاہیے، کیونکہ اصل پیمانہ صرف آواز کی مضبوطی نہیں بلکہ اس آواز کے ذریعے پیدا ہونے والی تبدیلی ہے۔ پاکستان کا مقصد جی 24 کے مشن کو آگے بڑھانا ہے تاکہ ”اجتماعی آواز سے اجتماعی اثر و رسوخ، اور اجتماعی اثر و رسوخ سے بامعنی پیش رفت“ تک کا سفر مکمل کیا جا سکے۔