سام سنگ کا 17 انچ فولڈ ایبل ٹیبلٹ: نئی معلومات سامنے آ گئیں

سام سنگ کی جانب سے ایک بڑے فولڈ ایبل ٹیبلٹ پر کام کیے جانے کی اطلاعات سامنے آئی ہیں، جس کی اسکرین کھلنے کی صورت میں تقریباً 17 انچ تک پہنچ سکتی ہے۔ ابتدائی معلومات کے مطابق ڈیوائس کو فولڈ کرنے کے بعد اس کی اسکرین کا سائز قریباً 8 انچ رہنے کا امکان ہے، تاہم کمپنی نے اس حوالے سے اب تک کوئی سرکاری تصدیق جاری نہیں کی۔

رپورٹس کے مطابق اس ڈیوائس کے ڈیزائن کو لے کر ابھی واضح تصویر نہیں بن سکی۔ ایک امکان یہ ظاہر کیا جا رہا ہے کہ ٹیبلٹ میں 17 انچ کی اسکرین دی جائے جو باہر کی جانب فولڈ ہو اور بند ہونے کی صورت میں اس کا صرف آدھا حصہ فعال رہے۔ دوسری صورت میں 17 انچ کی اندرونی فولڈ ایبل اسکرین کے ساتھ 8 انچ کا علیحدہ کور ڈسپلے بھی دیا جا سکتا ہے، جیسا کہ کمپنی کے گلیکسی زیڈ فولڈ اسمارٹ فونز میں دیکھنے کو ملتا ہے۔

دونوں ڈیزائنوں کے اپنے فوائد اور خدشات ہیں۔ پہلے ڈیزائن میں مرکزی اسکرین باہر کی جانب کھلی رہنے سے اس کے محفوظ رہنے کے حوالے سے سوالات اٹھ سکتے ہیں، جبکہ دوسرے ڈیزائن کی صورت میں ڈیوائس کی قیمت مزید بڑھنے کا امکان ہے۔ یہ پہلا موقع نہیں کہ سام سنگ کے فولڈ ایبل ٹیبلٹ کی خبریں سامنے آئی ہوں؛ اس سے قبل 2023 میں بھی گلیکسی زیڈ ٹیب کے نام سے ایسی ہی اطلاعات گردش کر چکی ہیں، تاہم اس وقت یہ منصوبہ عملی شکل اختیار نہ کر سکا۔

سام سنگ ڈسپلے مختلف ٹیکنالوجی نمائشوں میں بڑی فولڈ ایبل اسکرینز کے متعدد پروٹوٹائپس پیش کر چکا ہے، جو اس بات کا ثبوت ہے کہ کمپنی کے پاس اس ٹیکنالوجی پر کام کرنے کی صلاحیت موجود ہے۔ تاہم اصل سوال یہ ہے کہ آیا سام سنگ کا موبائل ڈویژن اتنی بڑی ڈیوائس کے لیے مارکیٹ میں مناسب طلب دیکھتا ہے یا نہیں۔

فولڈ ایبل ڈیوائسز کی مارکیٹ میں بھی مسلسل تبدیلیاں آ رہی ہیں۔ ایپل کی جانب سے آئی فون ڈوو کے ذریعے اس شعبے میں داخلے کے بعد سام سنگ کے لیے اپنی جدید ٹیکنالوجی اور صلاحیتوں کا مظاہرہ کرنا مزید اہم ہو سکتا ہے۔ واضح رہے کہ اس ممکنہ فولڈ ایبل ٹیبلٹ کی لانچنگ کے حوالے سے تاحال کوئی تاریخ سامنے نہیں آئی، اس لیے اس کی جلد آمد کی توقع کرنا قبل از وقت ہوگا۔