چین میں بین الاقوامی آرمی کیڈٹس ویک: پاکستانی کیڈٹس نے بین الاقوامی ٹیموں میں پہلی پوزیشن حاصل کی

چین کی آرمی انجینئرنگ یونیورسٹی نانجنگ میں 13ویں انٹرنیشنل آرمی کیڈٹس ویک کا انعقاد ہوا، جس میں پاکستان کے کالج آف الیکٹریکل اینڈ مکینیکل انجینئرنگ کے کیڈٹس نے نمایاں کارکردگی کا مظاہرہ کرتے ہوئے بین الاقوامی ٹیموں میں پہلی پوزیشن حاصل کی۔ اس مقابلے میں پاکستان کے علاوہ 11 ممالک کی فوجی اکیڈمیوں اور چین کی 18 فوجی اکیڈمیوں کے کیڈٹس نے شرکت کی۔

پاکستانی کیڈٹس نے مقابلے کی کانسیپٹ اینڈ پیپر کیٹیگری میں اپنا پروجیکٹ ’باکسر اَن مینڈ گراؤنڈ وہیکل‘ پیش کیا، جسے شرکاء کی جانب سے سراہا گیا۔ مجموعی طور پر 29 چینی اور بین الاقوامی ٹیموں کے درمیان ہونے والے اس مقابلے میں پاکستان نے دوسری پوزیشن حاصل کرکے سلور میڈل اپنے نام کیا۔

ایونٹ میں میانمار، آذربائیجان، سنگاپور، تھائی لینڈ، جنوبی کوریا، مصر اور ویتنام سمیت دیگر غیر ملکی ٹیموں نے بھی حصہ لیا۔ پاکستانی کیڈٹس کی اس کامیابی کو پاک فوج کی پیشہ ورانہ مہارت، تخلیقی صلاحیتوں اور جدید ٹیکنالوجی میں قابلیت کا مظہر قرار دیا جا رہا ہے۔

واضح رہے کہ اس طرح کے بین الاقوامی فوجی اور تعلیمی مقابلوں میں پاکستانی کیڈٹس کی شرکت ان کی تکنیکی مہارت اور عملی تربیت کو عالمی سطح پر اجاگر کرنے کا موقع فراہم کرتی ہے، جبکہ مختلف ممالک کی فوجی اکیڈمیوں کے درمیان تعاون اور تبادلے کے مواقع بھی پیدا ہوتے ہیں۔

یہ کامیابی نہ صرف پاکستانی کیڈٹس کی محنت اور لگن کا ثبوت ہے بلکہ ملکی تعلیمی و فنی اداروں کی استعداد کا بھی عکاس ہے، جنہیں بین الاقوامی سطح پر مزید نمائش اور تعاون کی ضرورت ہے۔