پاکستان میں فن ٹیک اور ڈیجیٹل ادائیگیوں میں تیزی، سرمایہ کاری کے نئے امکانات روشن

پاکستان میں ڈیجیٹل ادائیگیوں کا نظام تیزی سے تبدیل ہو رہا ہے اور کاروباری اداروں کے ساتھ ساتھ عام صارفین بھی لین دین کے روایتی طریقوں کی بجائے آن لائن اور موبائل ادائیگیوں کی طرف بڑھ رہے ہیں۔ اس رجحان نے ملک میں فن ٹیک کے شعبے کو ایک اہم صنعت کی شکل دے دی ہے اور سرمایہ کاری کے نئے دروازے کھول دیے ہیں۔

دستیاب اعداد و شمار کے مطابق مالی سال 2025 کے دوران ریٹیل ٹرانزیکشنز کی مجموعی تعداد 9.1 ارب رہی جن کی مالیت 612 کھرب روپے ریکارڈ کی گئی۔ اگلے مالی سال یعنی 2026 میں یہ تعداد بڑھ کر 14.3 ارب ٹرانزیکشنز اور مالیت 673 کھرب روپے تک جا پہنچی، جو ڈیجیٹل ادائیگیوں کے بڑھتے ہوئے استعمال کو واضح کرتا ہے۔

موبائل بینکنگ کے شعبے میں بھی مسلسل اضافہ دیکھا جا رہا ہے۔ مالی سال 2025 میں موبائل بینکنگ صارفین کی تعداد 24.1 ملین تک پہنچ گئی، جبکہ مالی سال 2021 میں یہ تعداد صرف 10.9 ملین تھی۔ صارفین کی اس بڑھتی ہوئی تعداد سے ظاہر ہوتا ہے کہ عوام اب بینک اکاؤنٹس اور مالی خدمات تک رسائی کے لیے موبائل فون کو ترجیح دے رہے ہیں۔

ڈیجیٹل معیشت کے اس تیز رفتار پھیلاؤ نے ملکی اور غیر ملکی فن ٹیک سرمایہ کاروں کے لیے منافع بخش مواقع پیدا کیے ہیں۔ ماہرین کے مطابق ادائیگیوں کے ڈھانچے میں بہتری، صارفین کی بڑھتی ہوئی تعداد اور ٹرانزیکشنز کے حجم میں مسلسل اضافہ اس شعبے کو طویل المدتی سرمایہ کاری کے لیے پرکشش بناتا ہے۔

ماہرین یہ بھی کہتے ہیں کہ ڈیجیٹل ادائیگیوں کے فروغ سے نہ صرف کاروبار آسان ہوئے ہیں بلکہ معیشت کی رسمی کاری کو بھی تقویت ملی ہے۔ تاہم اس شعبے کی پائیدار ترقی کے لیے صارفین کے تحفظ، ڈیٹا کی حفاظت اور مالیاتی اداروں کے درمیان اعتماد کو مزید مستحکم کرنا ضروری قرار دیا جا رہا ہے۔

مجموعی طور پر پاکستان کا فن ٹیک اور ڈیجیٹل ادائیگیوں کا شعبہ ترقی کی راہ پر گامزن ہے اور توقع ہے کہ آنے والے برسوں میں یہ شعبہ ملکی معیشت میں اپنا حصہ مزید بڑھائے گا۔