چاغی میں سونے اور تانبے کی تلاش کے لیے آئیون ہو مائنز اور ماڑی منرلز کے درمیان معاہدہ

پاکستان منرلز انویسٹمنٹ فورم کے موقع پر آئیون ہو مائنز اور ماڑی منرلز کے درمیان بلوچستان کے ضلع چاغی میں تانبے اور سونے کے ذخائر کی تلاش سے متعلق ایک معاہدہ طے پایا، جس پر باقاعدہ دستخط کر دیے گئے ہیں۔ اس معاہدے کا مقصد ملک کے معدنی وسائل کی صلاحیت کا جائزہ لینا اور چاغی کے علاقے میں قیمتی دھاتوں کی موجودگی کی تصدیق کرنا ہے۔

وفاقی وزیر پیٹرولیم علی پرویز ملک نے اس دستخطی تقریب میں شرکت کی اور اس دوران دنیا بھر کی نمایاں کان کنی اور سرمایہ کاری کمپنیوں کے سربراہان سے اہم ملاقاتیں بھی کیں۔ ان ملاقاتوں کا محور پاکستان میں معدنی شعبے کے فروغ اور مشترکہ منصوبوں کے امکانات تھے۔

اس موقع پر بیرک کارپوریشن کے چیئرمین جان تھورنٹن اور کمپنی کی سینئر قیادت نے بھی وفاقی وزیر سے ملاقات کی۔ جان تھورنٹن نے کہا کہ پاکستان آنا ہمیشہ خوشی کا باعث ہوتا ہے اور یہ دورہ کمپنی کے پاکستان کے ساتھ مسلسل روابط کو ظاہر کرتا ہے۔ اس کے علاوہ برطانیہ کی کان کنی اور انجینئرنگ کمپنی وئیر کے چیف ایگزیکٹو اینڈریو نیلسن نے بتایا کہ ان کی کمپنی ریکوڈک کے ساتھ ساتھ دیگر معدنی منصوبوں میں بھی اپنی شرکت بڑھانے کی خواہاں ہے۔

علی پرویز ملک نے عالمی کمپنی ٹریفگورا کے ہیڈ آف میٹلز اینڈ منرلز مینا ابراہیم الجزار سے بھی ملاقات کی۔ ٹریفگورا نے پاکستان کے زنک اور بیرایٹ منصوبوں کے علاوہ ایل پی جی، بانڈڈ اسٹوریج اور ریفائنری کے شعبوں میں سرمایہ کاری کے مواقع تلاش کرنے میں دلچسپی ظاہر کی ہے۔ وفاقی وزیر نے ترکیہ کی کمپنی چالک ہولڈنگ کے چیف ایگزیکٹو مصطفیٰ آکسوئے اور رابرٹ فریڈلینڈ کی قیادت میں آئیون ہو مائنز کے وفد سے بھی الگ الگ ملاقاتیں کیں۔

گفتگو کے دوران وفاقی وزیر پیٹرولیم علی پرویز ملک نے کہا کہ پاکستان منرلز انویسٹمنٹ فورم عالمی سرمایہ کاروں کو ملک میں سرمایہ کاری کے مواقع سے جوڑنے کا ایک اہم پلیٹ فارم ہے، اور بین الاقوامی کمپنیوں کی بڑھتی ہوئی دلچسپی پاکستان کے معدنی وسائل میں سرمایہ کاری کے وسیع امکانات کی عکاسی کرتی ہے۔