موبائل نیٹ ورک یا انٹرنیٹ کی خرابی کی صورت میں پی ٹی اے نے شکایت کا طریقہ کار واضح کر دیا

پاکستان ٹیلی کمیونیکیشن اتھارٹی (پی ٹی اے) نے موبائل نیٹ ورک، انٹرنیٹ یا ٹیلی کمیونیکیشن کی دیگر سہولتوں میں خرابی کی صورت میں شکایت درج کرانے کا طریقہ کار واضح کر دیا ہے۔ اتھارٹی کے مطابق صارفین کے لیے ضروری ہے کہ وہ سب سے پہلے متعلقہ ٹیلی کام کمپنی سے رابطہ کریں اور اگر مسئلہ حل نہ ہو تو پھر پی ٹی اے سے رجوع کریں۔

پی ٹی اے کی ہدایات کے مطابق کسی بھی ٹیلی کام سروس سے متعلق شکایت کی صورت میں پہلا قدم متعلقہ کمپنی کے کسٹمر سروس سینٹر سے رابطہ کرنا ہے۔ صارفین کمپنی کے کال سینٹر، ویب سائٹ، موبائل ایپ یا کسٹمر سروس سینٹر کے ذریعے اپنی شکایت جمع کرا سکتے ہیں۔ شکایت دیتے وقت مسئلے کی نوعیت اور اس سے متعلق تمام ضروری تفصیلات واضح طور پر بیان کرنا لازمی ہے۔

اتھارٹی نے صارفین کو ہدایت کی ہے کہ شکایت درج ہونے کے بعد اس کا ریفرنس یا کمپلینٹ نمبر ضرور حاصل کریں اور شکایت جمع کرانے کی تاریخ اور وقت بھی اپنے پاس محفوظ رکھیں۔ صارفین کو متعلقہ کمپنی کو مسئلہ حل کرنے کے لیے مناسب وقت دینا چاہیے۔ اگر مقررہ مدت میں شکایت کا ازالہ نہ ہو یا کمپنی کی جانب سے پیش کیا گیا حل صارف کے لیے قابلِ اطمینان نہ ہو تو وہ پی ٹی اے سے رابطہ کر سکتا ہے۔

اس مقصد کے لیے پی ٹی اے کا کمپلینٹ مینجمنٹ سسٹم (سی ایم ایس) موجود ہے، جس کے ذریعے آن لائن شکایت درج کرائی جا سکتی ہے۔ اتھارٹی سے رجوع کرتے وقت صارف کو اپنی ذاتی معلومات کے ساتھ متعلقہ کمپنی سے حاصل کردہ پہلے شکایت یا ریفرنس نمبر کی تفصیل بھی فراہم کرنا ہوگی۔

صارفین پی ٹی اے کے آن لائن پورٹل complaint.pta.gov.pk/CMS پر شکایت جمع کرا سکتے ہیں۔ اس کے علاوہ اینڈرائیڈ اور آئی او ایس صارفین کے لیے پی ٹی اے سی ایم ایس موبائل ایپ بھی دستیاب ہے۔ شکایت کے لیے ہیلپ لائن 0800-55055 پر رابطہ کیا جا سکتا ہے، جبکہ پی ٹی اے ہیڈکوارٹرز اور علاقائی دفاتر میں ذاتی طور پر بھی درخواست جمع کرائی جا سکتی ہے۔

پی ٹی اے کا کہنا ہے کہ شکایت کے مؤثر اندراج اور اس پر کارروائی کے لیے ضروری ہے کہ صارف پہلے متعلقہ ٹیلی کام کمپنی سے رابطہ کرے اور اس کا باقاعدہ شکایت نمبر حاصل کرنے کے بعد ہی ضرورت پڑنے پر اتھارٹی سے رجوع کرے۔ یہ طریقہ کار صارفین کو ٹیلی کام سروسز کے معیار سے متعلق مسائل کے فوری حل میں مدد فراہم کرتا ہے۔