واٹس ایپ نیا پرائیویسی فیچر لا رہا ہے: اب صارف خود طے کریں گے کہ ان کا نمبر کون دیکھ سکتا ہے

واٹس ایپ ایک نئی پرائیویسی سہولت پر کام کر رہا ہے جس کے تحت صارفین کو یہ اختیار حاصل ہوگا کہ وہ خود فیصلہ کریں کہ ان کا فون نمبر کون دیکھ سکتا ہے اور کون نہیں۔ ٹیکنالوجی ویب سائٹ واٹس ایپ بیٹا انفو کے مطابق اس فیچر کا انکشاف اینڈرائیڈ کے بیٹا ورژن 2.26.45.1 میں ہوا ہے۔

رپورٹ کے مطابق نئے فیچر میں فون نمبر کی نمائش کے لیے چار آپشنز دیے جائیں گے، جن میں تمام افراد، صرف رابطوں میں موجود افراد، منتخب رابطوں کے علاوہ دیگر افراد اور کوئی بھی نہیں شامل ہیں۔ ان سیٹنگز کے ذریعے صارفین یہ طے کر سکیں گے کہ واٹس ایپ پر کالز اور چیٹس کے دوران ان کا نمبر کن افراد کو نظر آئے گا۔

یہ سہولت خاص طور پر ان صارفین کے لیے مفید ہوگی جنہوں نے واٹس ایپ پر اپنا یوزرنیم بنایا ہوگا۔ تاہم اگر کسی شخص کے پاس پہلے سے صارف کا فون نمبر محفوظ ہو تو وہ اسے کالز اور چیٹس میں دیکھ سکے گا۔ فی الحال واٹس ایپ پر یوزرنیم کے ذریعے رابطہ کرنے والے افراد سے صارف کا فون نمبر خودکار طور پر چھپا رہتا ہے۔

نئے فیچر میں فون نمبر چھپانے کی ڈیفالٹ سیٹنگ ’کوئی بھی نہیں‘ رکھی جائے گی، جس کا مطلب ہے کہ صارفین کو اپنا نمبر پوشیدہ رکھنے کے لیے کوئی اضافی تبدیلی نہیں کرنی پڑے گی۔ دوسری جانب جو صارفین کاروباری یا دیگر مقاصد کے لیے اپنا نمبر دکھانا چاہتے ہیں، وہ اپنی ضرورت کے مطابق پرائیویسی سیٹنگ تبدیل کر سکیں گے۔

واضح رہے کہ واٹس ایپ کا یہ فیچر ابھی تیاری کے مراحل میں ہے اور اس کے اجرا کی حتمی تاریخ کا اعلان نہیں کیا گیا۔ اس سے قبل پاکستان ٹیلی کمیونیکیشن اتھارٹی نے میٹا کے تعاون سے ایک لاکھ 76 ہزار سے زائد واٹس ایپ اکاؤنٹس کو بلاک کیا تھا، جو صارفین کی ڈیجیٹل سلامتی کے حوالے سے اہم پیش رفت ہے۔