پاکستان کے پہلے خلا باز شینژو 24 مشن کے ذریعے چینی خلائی اسٹیشن جائیں گے

پاکستان اور چین کے درمیان خلائی تحقیق کے شعبے میں تعاون ایک نئے مرحلے میں داخل ہو گیا ہے۔ چائنا مینڈ اسپیس ایجنسی کے مطابق چین کے تعاون سے پہلے پاکستانی خلا باز کو چینی خلائی اسٹیشن کے مشن میں شامل کیا جائے گا، جو اس شعبے میں دونوں ممالک کے مشترکہ اقدامات کا اہم حصہ ہے۔

ایجنسی نے بتایا کہ پہلا پاکستانی خلا باز شینژو 24 خلائی جہاز کے ذریعے چینی خلائی اسٹیشن پہنچے گا اور مشن مکمل ہونے کے بعد شینژو 23 اسپیس کرافٹ کے ذریعے زمین پر واپس آئے گا۔ چینی خلائی پروگرام کی تاریخ میں یہ چینی اور پاکستانی خلا بازوں کی پہلی مشترکہ پرواز ہوگی۔

چائنا مینڈ اسپیس ایجنسی کے مطابق فروری 2025 میں چین اور پاکستان نے چینی خلائی اسٹیشن کے مشن میں شرکت کے لیے تعاون کے معاہدے پر دستخط کیے تھے۔ اس مشن کے لیے ابتدائی، ثانوی اور حتمی مراحل کی سخت اسکریننگ اور جائزے کے بعد دو پاکستانی خلا بازوں کا انتخاب کیا گیا تھا۔

ایجنسی نے مزید بتایا کہ چین میں مختلف نوعیت کی تربیت مکمل کرنے اور تمام ٹیسٹ کامیابی سے پاس کرنے کے بعد منتخب دو پاکستانی خلا بازوں میں سے ایک اس مشن میں حصہ لے گا۔ اس تربیت کا مقصد امیدواروں کو خلائی سفر کے تقاضوں اور چینی خلائی اسٹیشن کے ماحول کے لیے تیار کرنا ہے۔

یہ پیش رفت پاکستان کے لیے خلائی تحقیق کے میدان میں ایک اہم سنگ میل ہے اور اس سے دونوں ممالک کے سائنسی و تکنیکی تعاون کو مزید مضبوطی ملنے کی توقع ہے۔ خلائی ٹیکنالوجی کے شعبے میں یہ اشتراک پاکستان کی سائنسی صلاحیتوں کو بڑھانے اور بین الاقوامی خلائی منصوبوں میں شرکت کے امکانات کو وسعت دینے کا باعث بن سکتا ہے۔