پاکستان کا بیرونی قرضہ ایک دہائی میں تقریباً دگنا، 135 ارب ڈالر تک پہنچ گیا

عالمی بینک کی جانب سے جاری کردہ بین الاقوامی قرضہ جات کی رپورٹ 2026 کے مطابق 2025 میں اختتام پذیر ہونے والی دہائی کے دوران پاکستان کا کل بیرونی قرضہ تقریباً دوگنا ہو کر 135.107 ارب ڈالر تک پہنچ گیا۔ رپورٹ میں بتایا گیا کہ 2015 میں یہ قرضہ 68.673 ارب ڈالر تھا، جس کے بعد دہائی کے دوران اس میں نمایاں اضافہ ریکارڈ کیا گیا۔

رپورٹ کے مطابق 2025 میں کل بیرونی قرضے میں 107.076 ارب ڈالر کا سرکاری اور سرکاری ضمانت یافتہ قرضہ شامل تھا، جبکہ 17.58 ارب ڈالر کا نجی غیر ضمانت شدہ قرضہ اور 10.45 ارب ڈالر کا قلیل مدتی قرضہ بھی اس میں شامل ہے۔ سرکاری اور سرکاری ضمانت یافتہ قرضوں میں سے 56.83 ارب ڈالر کثیر الجہتی قرض دہندگان کے واجب الادا ہیں، 42.43 ارب ڈالر دو طرفہ قرض دہندگان کے اور 7.8 ارب ڈالر نجی قرض دہندگان کے ہیں۔

پاکستان کے سب سے بڑے انفرادی قرض دہندہ کے طور پر چین سرفہرست رہا، جس کے 22.4 ارب ڈالر واجب الادا ہیں۔ اس کے بعد عالمی بینک کے 19.2 ارب ڈالر اور ایشیائی ترقیاتی بینک کے 16.83 ارب ڈالر واجب الادا ہیں۔ رپورٹ میں یہ بھی بتایا گیا کہ 2025 کے دوران چین نے پاکستان کو دیے گئے دو ارب ڈالر کے قرضوں کی واپسی کی مدت میں توسیع کی۔

اسی طرح بین الاقوامی مالیاتی فنڈ نے پاکستان کی طویل مدتی معاشی استحکام میں معاونت کے لیے ایکسٹینڈڈ فنڈ فیسیلٹی اور ریزیلینس اینڈ سسٹین ایبلٹی فیسیلٹی کے تحت 2.3 ارب ڈالر کی نئی رقوم فراہم کیں۔ ماہرین کے مطابق ان اقدامات نے ملک کے بیرونی مالیاتی دباؤ کو کم کرنے میں مدد فراہم کی۔

بیرونی قرضے میں اس تیزی سے اضافے کے باوجود حکام معاشی استحکام کے لیے مختلف اقدامات کر رہے ہیں، جن میں قرضوں کی تنظیم نو اور طویل مدتی ادائیگیوں کی منصوبہ بندی شامل ہے۔ رپورٹ کے اعداد و شمار پاکستان کی معیشت کے لیے بیرونی قرضوں کے بڑھتے ہوئے بوجھ اور اس کے مؤثر انتظام کی اہمیت کو اجاگر کرتے ہیں۔