ایل پی جی کی شفاف نیلامی کا نیا نظام متعارف، 90 فیصد نجی کمپنیوں کو دیا جائے گا

حکومت نے ایل پی جی (لپٹیٹ پٹرولیم گیس) کی دستیابی کو یقینی بنانے اور اس کی شفاف نیلامی کے لیے نیا نظام متعارف کروا دیا ہے۔ اس نظام کے تحت مقامی پیداوار کا 10 فیصد حصہ سرکاری مارکیٹنگ کمپنیوں کو جبکہ باقی 90 فیصد نجی مارکیٹنگ کمپنیوں کو نیلامی کے ذریعے فراہم کیا جائے گا۔ یہ اقدام ایل پی جی کی منصفانہ تقسیم اور صارفین تک مناسب قیمت پر فراہمی کو یقینی بنانے کے لیے اٹھایا گیا ہے۔

سیکرٹری پیٹرولیم کی زیر صدارت ایل پی جی کی شفاف نیلامی کے لیے قائم کمیٹی کا پہلا اجلاس منعقد ہوا، جس میں فیصلہ کیا گیا کہ مقامی ایل پی جی پیدا کرنے والے ادارے اپنی مجموعی پیداوار کا 10 فیصد سرکاری مارکیٹنگ کمپنیوں کے لیے مختص کریں گے، جبکہ بقیہ 90 فیصد ایل پی جی میڈیا کی موجودگی میں شفاف نیلامی کے ذریعے فروخت کی جائے گی۔ کمیٹی کے مطابق نیلامی میں ہر کمپنی کو یومیہ زیادہ سے زیادہ 20 میٹرک ٹن ایل پی جی حاصل کرنے کی اجازت ہوگی اور تمام اہل کمپنیوں کو مساوی مواقع فراہم کیے جائیں گے۔

اجلاس میں یہ بھی فیصلہ کیا گیا کہ ایل پی جی کی یومیہ پیداوار کی نگرانی کی جائے گی اور اس حوالے سے اعداد و شمار وزیراعظم کو پیش کیے جائیں گے۔ اس اقدام کا مقصد سپلائی چین کو مستحکم کرنا اور توانائی کے تحفظ کو یقینی بنانا ہے۔

وفاقی وزیر پٹرولیم علی پرویز ملک نے کہا کہ ایل پی جی کی دستیابی اور غیر منصفانہ قیمتوں سے متعلق عوامی تحفظات دور کرنا حکومت کی ترجیح ہے۔ انہوں نے کہا کہ نیلامی کا نیا نظام ایل پی جی کی منصفانہ تقسیم، سپلائی چین کے استحکام اور توانائی کے تحفظ میں معاون ثابت ہوگا۔ حکومت کا مقصد صارفین کو مناسب قیمتوں پر ایل پی جی کی بہتر فراہمی یقینی بنانا ہے۔

واضح رہے کہ وفاقی کابینہ نے 4 نومبر 2026 کو ایل پی جی کی شفاف نیلامی کے فریم ورک کی منظوری دی تھی، جس کے بعد اب اس پر عمل درآمد کا آغاز کر دیا گیا ہے۔