لاہور میں ایل پی جی 600 روپے فی کلو تک فروخت، سرکاری قیمت 295 روپے ہونے کے باوجود کمی نہ ہو سکی

لاہور میں مائع پیٹرولیم گیس (ایل پی جی) کی قیمتوں میں کمی کے باوجود شہریوں کو مہنگے داموں گیس خریدنا پڑ رہی ہے۔ اوگرا کی جانب سے قیمتوں کا نوٹیفکیشن جاری ہونے کے باوجود شہر میں ایل پی جی 600 روپے فی کلو تک فروخت کی جا رہی ہے۔

سرکاری طور پر لاہور میں ایل پی جی کی قیمت 295 روپے فی کلو مقرر ہے، تاہم صارفین کو یہ گیس مارکیٹ میں دو گنا سے بھی زیادہ قیمت پر دستیاب ہے۔ اس صورتحال نے عام صارفین کے بجٹ پر مزید بوجھ ڈال دیا ہے، خاص طور پر ان گھرانوں کے لیے جو کھانا پکانے کے لیے ایل پی جی پر انحصار کرتے ہیں۔

دکانداروں کا موقف ہے کہ گزشتہ دو ماہ سے اوگرا کی جانب سے ایل پی جی مافیا کے خلاف کوئی موثر کارروائی نہیں کی گئی۔ ان کے مطابق پیرا فورس اور دیگر ادارے ان کے پمپ اٹھا کر لے جاتے ہیں، جبکہ ایل پی جی کی غیر قانونی تجارت میں ملوث عناصر اربوں روپے کما رہے ہیں اور قانونی کارروائیوں کا سامنا عام دکانداروں کو کرنا پڑتا ہے۔

ایک دکاندار نے بتایا کہ جب گیس خود انہیں ساڑھے پانچ سو سے 600 روپے فی کلو کے حساب سے فراہم کی جا رہی ہے تو وہ اسے 295 روپے میں کیسے فروخت کر سکتے ہیں۔ ان کا کہنا تھا کہ اگر گیس سستی دستیاب ہو گی تو وہ بھی صارفین کو کم قیمت پر فروخت کریں گے۔

واضح رہے کہ وفاقی وزیر پٹرولیم نے بھی ایل پی جی کی غیر منصفانہ قیمتوں سے متعلق تحفظات دور کرنے کو ترجیح قرار دیا ہے۔ ماہرین کے مطابق قیمتوں میں اس فرق کو ختم کرنے کے لیے سپلائی چین کی نگرانی اور غیر قانونی ذخیرہ اندوزی کے خلاف سخت کارروائی ضروری ہے، تاکہ صارفین کو ریلیف فراہم کیا جا سکے۔