پاکستانی خلا باز چین کے خلائی اسٹیشن پر قدم رکھنے والے پہلے غیر ملکی ہوں گے

پاکستان اور چین کے خلائی تعاون میں ایک اہم پیش رفت سامنے آئی ہے، جس کے تحت ایک پاکستانی خلا باز چین کے خلائی اسٹیشن پر قدم رکھنے والے پہلے غیر ملکی خلا باز بنیں گے۔ چینی سفارتخانے کے ترجمان کے مطابق چینی وزارت خارجہ نے اعلان کیا ہے کہ ایک پاکستانی خلا باز چین کے انسانی خلائی مشن کا حصہ ہوں گے۔ یہ مشن چین کے خلائی پروگرام کی تاریخ میں اس نوعیت کا پہلا مشن ہوگا جس میں چینی اور غیر ملکی خلا باز مشترکہ طور پر خلائی سفر کریں گے۔

چینی سفارتخانے کا کہنا ہے کہ یہ پیش رفت پاکستان اور چین کی دیرینہ دوستی کو نئی بلندیوں تک لے جانے کے ساتھ ساتھ نوجوان نسل کو سائنس اور ٹیکنالوجی کے میدان میں آگے بڑھنے کی ترغیب دے گی۔ اس اشتراک سے دونوں ممالک کے درمیان خلائی تحقیق، جدید ٹیکنالوجی اور سائنسی تجربات کے شعبوں میں تعاون کے نئے امکانات پیدا ہوں گے۔

واضح رہے کہ یہ اعلان ایسے وقت میں سامنے آیا ہے جب پاکستان اور چین سفارتی تعلقات کی 75ویں سالگرہ منا رہے ہیں۔ چینی سفارتخانے نے اس تاریخی مشن کے لیے منتخب کیے گئے دونوں پاکستانی خلا بازوں کی تصاویر بھی جاری کی ہیں۔

ماہرین کے مطابق یہ مشن پاکستان کے خلائی پروگرام کے لیے ایک سنگ میل ثابت ہوگا اور اس سے ملک میں خلائی سائنس کی تعلیم اور تحقیق کو فروغ ملے گا۔ اس کے علاوہ دونوں ممالک کے درمیان تکنیکی اور سائنسی تبادلے میں بھی اضافہ متوقع ہے۔

یاد رہے کہ چین کا خلائی اسٹیشن تیانگونگ گذشتہ کچھ عرصے سے مدار میں فعال ہے اور چین نے اسے بین الاقوامی خلائی تعاون کے لیے کھولنے کا اعلان کیا تھا۔ پاکستانی خلا باز کی شمولیت اس سلسلے کی پہلی مثال ہوگی۔