وزیر آئی ٹی شزا فاطمہ کا مارگلہ ڈائیلاگ میں ڈیجیٹل تبدیلی اور مصنوعی ذہانت پر خطاب

اسلام آباد میں منعقدہ مارگلہ ڈائیلاگ کے دوسرے روز خطاب کرتے ہوئے وفاقی وزیر برائے انفارمیشن ٹیکنالوجی شزا فاطمہ نے کہا کہ ٹیکنالوجی دنیا بھر میں ریاستوں اور معاشروں کی تشکیلِ نو کر رہی ہے اور مصنوعی ذہانت نے اس تبدیلی کی رفتار کو مزید تیز کر دیا ہے۔ انہوں نے کہا کہ تعلیم، صحت، مالیات اور قومی سلامتی سمیت زندگی کا کوئی شعبہ ٹیکنالوجی کے اثرات سے محفوظ نہیں اور اب اصل سوال یہ نہیں کہ دنیا کیسے بدلے گی بلکہ یہ ہے کہ اس تبدیلی کی سمت کون متعین کرے گا۔

وزیر آئی ٹی نے کہا کہ ہر کلک اور ہر اسکرول کے ذریعے ہماری حقیقت اور سوچ کو تشکیل دیا جا رہا ہے، اس لیے یہ سوال اہم ہے کہ ڈیجیٹل دنیا میں ہماری ترجیحات اور سماجی رویوں کی تشکیل کون کر رہا ہے۔ انہوں نے اس بات پر زور دیا کہ پاکستان کی دو تہائی آبادی نوجوانوں پر مشتمل ہے اور ڈیجیٹل تبدیلی نوجوان نسل کے مستقبل کے لیے انتہائی اہم ہے۔

انہوں نے کہا کہ ٹیکنالوجی کے اس دور میں پاکستان کی معاشی اور قومی سلامتی کے ساتھ سماجی شناخت بھی داؤ پر لگی ہے۔ مصنوعی ذہانت کے بڑھتے اثرات کے پیش نظر پاکستان کو اپنی ڈیجیٹل ترجیحات کا تعین کرنا ہوگا اور عالمی سطح پر ٹیکنالوجی کی تبدیلی میں اپنا مؤثر کردار ادا کرنا ہوگا۔

شزا فاطمہ نے بتایا کہ پاکستان محدود وسائل کے باوجود ڈیجیٹل تبدیلی کے لیے عالمی اور ترقیاتی شراکت داروں کے ساتھ تعاون بڑھا رہا ہے۔ ان کے مطابق ملک میں ڈیجیٹل انفراسٹرکچر، مہارتوں، جدت اور کنیکٹیویٹی کے لیے ایک ارب ڈالر متحرک کرنے کا منصوبہ ہے جو ڈیجیٹل نظام کی بنیادی صلاحیتوں کو مضبوط بنانے میں مدد دے گا۔

وزیر آئی ٹی نے کہا کہ پاکستان مصنوعی ذہانت کے فروغ کے لیے بنیادی کمپیوٹنگ انفراسٹرکچر تیار کر رہا ہے، جو اس شعبے کا سب سے زیادہ سرمایہ طلب مرحلہ ہے۔ انہوں نے کہا کہ قومی خودمختاری اور سائبر سکیورٹی ملک کی تکنیکی ترقی کی حکمت عملی کے بنیادی ستون ہیں اور نوجوانوں کو مصنوعی ذہانت اور جدید ٹیکنالوجی کے مواقع اور چیلنجز سے نمٹنے کے لیے تیار کرنا ضروری ہے۔

خیال رہے کہ اس موقع پر وزیر نے سائبر دفاع کو قومی سلامتی کا اہم جزو قرار دیتے ہوئے کہا کہ پاکستان اپنی خودمختار تکنیکی صلاحیتوں اور سائبر دفاعی نظام کو مزید مضبوط بنا رہا ہے۔ مارگلہ ڈائیلاگ کا انعقاد ٹیکنالوجی، پالیسی اور ترقیاتی امور پر بحث کے لیے کیا گیا جس میں ملکی اور بین الاقوامی شرکا نے شرکت کی۔