لاہور میں سیف سٹی کیمروں کی مدد سے چوری کی متعدد وارداتوں میں ملوث میاں بیوی گرفتار

لاہور میں سیف سٹی کے جدید کیمروں اور ویڈیو تجزیہ ٹیکنالوجی کی مدد سے پولیس نے ایسے میاں بیوی کو گرفتار کیا ہے جو شہر کے مختلف علاقوں میں چوری کی متعدد وارداتوں میں ملوث تھے۔ سیف سٹی کے ترجمان کے مطابق ملزمان اقبال ٹاؤن، اچھرہ، سمن آباد اور ملت پارک میں ہونے والی چوری کی وارداتوں میں شامل تھے، جن کے خلاف مختلف تھانوں میں متعدد مقدمات درج ہیں۔

ترجمان نے بتایا کہ سیف سٹی کی ورچوئل پٹرولنگ ٹیم کے افسران نے مختلف وارداتوں کی فوٹیج کا تفصیلی جائزہ لے کر ملزمان کی ٹریسنگ کا عمل شروع کیا، جس کے بعد ویڈیوز کے تجزیے سے اس موٹر سائیکل کی نشاندہی کی گئی جو وارداتوں کے دوران استعمال کی گئی تھی۔ جدید ٹیکنالوجی کی مدد سے ملزمان کی شناخت اور موٹر سائیکل کی تفصیلات حاصل کی گئیں۔

سیف سٹی ٹیم نے ملزمان کی تصاویر، موٹر سائیکل سے متعلق معلومات اور دیگر ڈیجیٹل شواہد متعلقہ پولیس کو فراہم کیے، جس کے بعد پولیس نے ٹارگٹڈ کارروائی کرتے ہوئے میاں بیوی کو گرفتار کر لیا۔ ترجمان کے مطابق اس کارروائی سے یہ ثابت ہوتا ہے کہ کیمروں کی فراہم کردہ معلومات مجرمانہ عناصر کی نشاندہی اور ان کی گرفتاری میں مؤثر کردار ادا کر رہی ہیں۔

ترجمان سیف سٹیز نے مزید کہا کہ پنجاب بھر میں سیف سٹی کیمروں کے ذریعے مسلسل نگرانی جاری ہے تاکہ جرائم پیشہ افراد کی نقل و حرکت پر نظر رکھی جا سکے اور قانون نافذ کرنے والے اداروں کو بروقت معلومات فراہم کی جا سکیں۔ اس طرح کی ٹیکنالوجی شہریوں کی حفاظت اور جرائم کی روک تھام میں معاون ثابت ہو رہی ہے۔

واضح رہے کہ سیف سٹی منصوبہ پہلے ہی متعدد مواقع پر جرائم کی نشاندہی اور گرفتاریوں میں مدد فراہم کر چکا ہے، اور حکام کا کہنا ہے کہ اس نظام کو مزید موثر بنانے کے لیے کام جاری ہے تاکہ شہریوں کو محفوظ ماحول فراہم کیا جا سکے۔