پراپرٹی جرائم میں نمایاں کمی، ڈکیتی اور راہزنی کے واقعات میں 95 فیصد تک گراوٹ

ملک میں پراپرٹی جرائم میں حالیہ برسوں کے دوران نمایاں کمی ریکارڈ کی گئی ہے۔ سرکاری اعداد و شمار کے مطابق رواں سال مجموعی پراپرٹی جرائم 2024 کے مقابلے میں 82 فیصد جبکہ گزشتہ سال کے مقابلے میں 73 فیصد کم ہوئے ہیں۔

اعداد و شمار کے مطابق 2026 کے پہلے 10 ماہ میں مجموعی پراپرٹی جرائم 2023 کے مقابلے میں 88 فیصد کمی کے ساتھ سامنے آئے ہیں، جو کئی برسوں کے دوران ایک واضح بہتری کو ظاہر کرتا ہے۔

تفصیلات کے مطابق ڈکیتی کی وارداتوں میں گزشتہ سال کے مقابلے میں 95 فیصد کمی ریکارڈ کی گئی، جبکہ راہزنی کے واقعات میں 78 فیصد کمی دیکھی گئی۔ اسی طرح موٹر سائیکل چوری کے واقعات میں 71 فیصد اور کار چوری کے واقعات میں 86 فیصد کمی واقع ہوئی ہے۔

موٹر سائیکل چھیننے کے واقعات میں 86 فیصد جبکہ گاڑی چھیننے کے واقعات میں 95 فیصد کمی ریکارڈ کی گئی ہے۔ نقب زنی کے واقعات میں بھی گزشتہ سال کے مقابلے میں 78 فیصد کمی سامنے آئی ہے۔

ڈی آئی جی آپریشنز کے مطابق جرائم میں اس کمی کو شہریوں کے تحفظ کے لیے پولیس کی مسلسل محنت کا نتیجہ قرار دیا گیا ہے۔ ان کا کہنا ہے کہ مؤثر گشت اور ٹارگٹڈ کارروائیوں کے ذریعے جرائم کی روک تھام کو مزید بہتر بنایا جا رہا ہے۔

انہوں نے مزید کہا کہ شہریوں کے جان و مال کا تحفظ پولیس کی اولین ترجیح ہے اور جرائم پیشہ عناصر کے خلاف کارروائیاں مزید تیز کی جائیں گی تاکہ عوام میں تحفظ کا احساس برقرار رہے۔