ہنگو میں پولیس پوسٹ پر دہشت گردوں کا حملہ: ایک اہلکار شہید، تین اغوا

خیبر پختونخوا کے ضلع ہنگو میں شاہ الماس پیر پہاڑی پر قائم پولیس پوسٹ پر دہشت گردوں نے حملہ کیا، جس کے نتیجے میں ایک پولیس اہلکار شہید ہو گیا جبکہ تین اہلکار اغوا کر لیے گئے۔ پولیس کے مطابق حملے کی اطلاع ملتے ہی پولیس اور سیکورٹی فورسز کی بھاری نفری جائے وقوع پر پہنچ گئی اور دہشت گردوں کے ساتھ فائرنگ کا تبادلہ ہوا۔

ڈسٹرکٹ پولیس آفیسر ہنگو صلاح الدین کنڈی نے بتایا کہ اغوا کیے گئے تینوں پولیس اہلکاروں کو دہشت گرد سمانہ پہاڑی خانانو کوٹہ کی جانب لے گئے ہیں، تاہم پولیس جوانوں نے شاہ الماس پیر پہاڑی پر دوبارہ کنٹرول سنبھال لیا ہے اور فرار ہونے والے حملہ آوروں کا تعاقب جاری ہے۔

حملے میں شہید ہونے والے کانسٹیبل فیروز علی کی نماز جنازہ پولیس لائن ہنگو میں سرکاری اعزاز کے ساتھ ادا کی گئی، جس میں ڈی پی او ہنگو، پاک فوج اور پولیس کے افسران و جوانوں نے شرکت کی۔ اس موقع پر افسران نے شہید کے جسد خاکی پر پھولوں کی چادریں چڑھائیں اور ان کی قربانی کو خراج عقیدت پیش کیا۔

نماز جنازہ کے بعد شہید کانسٹیبل کا جسد خاکی مکمل سرکاری اعزاز کے ساتھ ان کے آبائی گاؤں ابراہیم زئی روانہ کر دیا گیا۔ واقعے کے بعد علاقے میں سیکورٹی کی صورتحال کو مزید مستحکم کرنے اور فرار ملزمان کی نشاندہی کے لیے کارروائیاں جاری ہیں۔

واضح رہے کہ پاکستان کے قبائلی و سرحدی اضلاع میں سیکورٹی فورسز کی تنصیبات کو نشانہ بنانے کے واقعات وقتاً فوقتاً سامنے آتے رہے ہیں، جبکہ ریاستی ادارے ان حملوں کے خلاف کارروائیاں جاری رکھے ہوئے ہیں۔ حکام نے عوام سے اپیل کی ہے کہ وہ مشکوک حرکتوں کی اطلاع متعلقہ اداروں کو دیں تاکہ ایسے واقعات کو روکا جا سکے۔