خیبرپختونخوا کی 26 سرکاری جامعات خسارے میں، وفاق سے 18 ارب روپے گرانٹ کا مطالبہ

خیبرپختونخوا میں اعلیٰ تعلیم کے شعبے کو سنگین مالی مسائل کا سامنا ہے۔ صوبے کی 34 سرکاری جامعات میں سے 26 جامعات گزشتہ برسوں کے دوران مالی خسارے کا شکار ہو چکی ہیں، جبکہ مجموعی خسارے کی رقم 5 ارب 60 کروڑ روپے تک پہنچ گئی ہے۔ اس صورتحال کے پیش نظر صوبائی محکمہ اعلیٰ تعلیم نے ہائر ایجوکیشن کمیشن کے چیئرمین کو خط ارسال کیا ہے، جس میں وفاقی حکومت سے 18 ارب روپے کی خصوصی گرانٹ فراہم کرنے کی درخواست کی گئی ہے۔

خط کے مطابق گزشتہ دس سال کے دوران جامعات کو گرانٹس کی مد میں 18 ارب روپے کی کمی کا سامنا رہا ہے، جبکہ صرف گزشتہ تین سالوں میں ایچ ای سی کی گرانٹ میں 6.3 فیصد کمی واقع ہوئی ہے۔ اس کے برعکس جامعات کے اخراجات میں 18 فیصد سے زائد کا اضافہ ہوا ہے، جس کی بڑی وجہ تنخواہوں اور پنشن کے بڑھتے ہوئے اخراجات ہیں۔ محکمے نے واضح کیا ہے کہ فنڈز میں کمی اور اخراجات میں مسلسل اضافے نے جامعات کی مالی کارکردگی کو بری طرح متاثر کیا ہے۔

صوبائی حکومت نے بھی جامعات کے لیے اپنی گرانٹ میں اضافہ کرتے ہوئے اسے 11 ارب 85 کروڑ روپے تک پہنچایا ہے، تاہم محکمہ اعلیٰ تعلیم کے مطابق یہ رقم مالی مسائل کے مکمل خاتمے کے لیے ناکافی ہے اور اسے وفاقی سطح پر مزید معاونت کی ضرورت ہے۔ خط میں تجویز دی گئی ہے کہ جامعات کو گرانٹس طلبہ کی تعداد کے تناسب سے فراہم کی جائیں تاکہ وسائل کی منصفانہ تقسیم کو یقینی بنایا جا سکے۔

اس وقت خیبرپختونخوا کی سرکاری جامعات میں تقریباً دو لاکھ طلبہ زیر تعلیم ہیں، جن پر مالی مشکلات کے سبب فیسوں کے اضافے کا خطرہ منڈلا رہا ہے۔ محکمے نے اپنے خط میں واضح موقف اختیار کیا ہے کہ خسارے کی تلافی کے لیے طلبہ اور ان کے خاندانوں پر فیسوں کا مزید بوجھ ڈالنا مناسب نہیں، کیونکہ اس سے تعلیم تک رسائی متاثر ہو سکتی ہے۔

ماہرین تعلیم کے مطابق مالی استحکام کے بغیر اعلیٰ تعلیمی اداروں میں معیار، تحقیق اور اساتذہ کی کارکردگی برقرار رکھنا مشکل ہو جاتا ہے۔ وفاقی گرانٹ کی منظوری سے نہ صرف جامعات کے خسارے میں کمی آ سکتی ہے بلکہ طلبہ کو فیسوں کے بوجھ سے بچانے میں بھی مدد ملے گی، جس سے صوبے میں اعلیٰ تعلیم کے فروغ کو تقویت ملنے کی امید ہے۔