پنجاب اسمبلی میں سی سی ڈی پولیس مقابلوں میں ہلاکتوں کی تحقیقات کا مطالبہ

پنجاب اسمبلی میں اپوزیشن ارکان نے کرائم کنٹرول ڈیپارٹمنٹ (سی سی ڈی) کی کارروائیوں کے دوران مبینہ پولیس مقابلوں میں ہلاکتوں کی تحقیقات کے لیے تحریک التوا جمع کروانے کا فیصلہ کیا ہے۔ اپوزیشن رکن اسمبلی احمر بھٹی تقریباً پندرہ اپوزیشن ارکان کے ہمراہ یہ تحریک ایوان میں پیش کریں گے، جس میں واقعات کی غیر جانبدارانہ چھان بین اور ذمہ دار افسران کی نشاندہی کا مطالبہ شامل ہے۔

تحریک کے متن کے مطابق پنجاب میں سی سی ڈی کی کارروائیوں کے دوران پولیس مقابلوں میں 924 افراد ہلاک ہوئے۔ متن میں ہیومن رائٹس کمیشن کی رپورٹ کا حوالہ دیتے ہوئے کہا گیا ہے کہ ان ہلاکتوں کی نوعیت اور حالات کا آزادانہ تعین ضروری ہے، کیونکہ طاقت کے استعمال اور اس کی قانونی حیثیت پر سنگین سوالات اٹھائے جا رہے ہیں۔

تحریک میں واضح کیا گیا ہے کہ کسی شخص پر سنگین الزامات ہونے کے باوجود اسے قانون کے مطابق گرفتاری، منصفانہ سماعت اور عدالتی کارروائی کا حق حاصل ہے، اور کسی ملزم کو سزا دینے کا اختیار صرف عدالتوں کے پاس ہے۔ متن میں آئین کے آرٹیکل 9، 10، 10-A اور 14 کا حوالہ دیتے ہوئے کہا گیا ہے کہ شہریوں کی جان، تحفظ، انسانی وقار اور منصفانہ سماعت کو بنیادی آئینی تحفظ حاصل ہے۔

اپوزیشن کا مطالبہ ہے کہ چیف جسٹس ہائی کورٹ کی سربراہی میں ایک بااختیار عدالتی کمیشن تشکیل دیا جائے، جس میں کسی دوسرے صوبے سے تعلق رکھنے والے ریٹائرڈ پولیس آئی جی، ہائی کورٹ کے سینئر نمائندے اور انسانی حقوق کے شعبے کے ماہر کو شامل کیا جائے۔ مجوزہ کمیشن سی سی ڈی کی کارروائیوں اور ان کے نتیجے میں ہونے والی ہلاکتوں کی شفاف تحقیقات کرے گا۔

تحریک میں مزید کہا گیا ہے کہ متاثرین اور ان کے خاندانوں کو انصاف کی فراہمی، شواہد کا تحفظ اور قانون کی خلاف ورزی کی صورت میں مؤثر کارروائی کو یقینی بنایا جائے۔ احمر بھٹی کے مطابق سی سی ڈی کی کارروائیوں کی منصفانہ تحقیقات ضروری ہے اور یہ تحریک مشترکہ طور پر جمع کروائی جائے گی۔