بجلی اور گیس سبسڈی کا نیا نظام: موجودہ سلیب ختم کرنے کی تیاری

وفاقی حکومت نے بجلی اور گیس صارفین کو سبسڈی فراہم کرنے کے لیے نیا طریقہ کار تیار کر لیا ہے، جس کے تحت موجودہ سلیب نظام ختم کرنے کی تیاری کی جا رہی ہے۔ ذرائع کے مطابق پاور ڈویژن اور وزارت پیٹرولیم نے سبسڈی کی فراہمی کے لیے نئی اکنامک سوشل رجسٹری بھی تیار کر لی ہے۔

رپورٹ کے مطابق عالمی مالیاتی فنڈ (آئی ایم ایف) بجلی صارفین کے لیے یکم جنوری جبکہ گیس صارفین کے لیے فروری 2027 سے نیا نظام نافذ کرنا چاہتا ہے۔ تاہم حکومت موجودہ سبسڈی کے طریقہ کار کو 30 جون 2027 تک برقرار رکھنے کی خواہاں ہے۔

ذرائع نے بتایا کہ نئے سبسڈی نظام پر عمل درآمد کا فیصلہ نائب وزیراعظم اسحاق ڈار کی سربراہی میں قائم اسٹیئرنگ کمیٹی کرے گی، اور عمل درآمد سے قبل اس کا ٹیسٹ رن بھی کیا جائے گا تاکہ ممکنہ مشکلات کا ازالہ ہو سکے۔

مزید برآں وزیراعظم شہباز شریف کی ہدایت پر ریلیف مزید چھ ماہ جاری رکھنے کا معاملہ آئی ایم ایف کے سامنے اٹھایا جائے گا۔ حکومت 200 یونٹ تک بجلی استعمال کرنے والے صارفین کو سبسڈی میں چھ ماہ کی توسیع دینے کے لیے کوشاں ہے۔

واضح رہے کہ سبسڈی کے نئے نظام کا مقصد اخراجات کو کم کرنا اور مستحق صارفین تک ریلیف پہنچانا ہے۔ ماہرین کے مطابق نئی اکنامک سوشل رجسٹری کی مدد سے سبسڈی کی تقسیم میں شفافیت آئے گی اور وسائل کا بہتر استعمال ممکن ہو گا۔

یہ پیش رفت ایسے وقت سامنے آئی ہے جب ملک میں توانائی کے شعبے میں اصلاحات اور گردشی قرضے کے خاتمے کے حوالے سے اقدامات جاری ہیں۔ حکومت کی کوشش ہے کہ نئے نظام کے نفاذ سے قبل عوام کو درپیش مشکلات کو کم سے کم کیا جائے۔