پاکستان منرلز انویسٹمنٹ فورم 12 اور 13 نومبر کو اسلام آباد میں منعقد ہوگا

پاکستان اپنے وسیع معدنی ذخائر کو بروئے کار لاتے ہوئے عالمی مائننگ کمپنیوں کی میزبانی اور غیر ملکی سرمایہ کاری کے لیے پرعزم ہے۔ اسی مقصد کے تحت پاکستان منرلز انویسٹمنٹ فورم 12 اور 13 نومبر کو اسلام آباد میں منعقد ہو رہا ہے، جس کا اہتمام اسپیشل انویسٹمنٹ فیسلیشن کونسل (ایس آئی ایف سی) کے تعاون سے کیا جا رہا ہے۔

فورم میں ملکی سیاسی و عسکری قیادت کے ساتھ ساتھ عالمی مائننگ ایگزیکٹوز، سرمایہ کاروں، پالیسی سازوں اور شعبے کے ماہرین شرکت کریں گے۔ اس موقع پر معدنیات اور مائننگ کی ویلیو چین سے متعلق کمپنیوں، منصوبوں، مصنوعات، خدمات، سازوسامان اور ٹیکنالوجیز کی نمائش بھی منعقد کی جائے گی تاکہ شرکا کو پاکستان کے معدنی شعبے کی صلاحیتوں کا براہ راست جائزہ لینے کا موقع مل سکے۔

فورم کا بنیادی مقصد پاکستان کے قیمتی معدنی ذخائر اور وسائل کو مؤثر انداز میں استعمال کرتے ہوئے ملکی اور غیر ملکی سرمایہ کاری کو فروغ دینا ہے۔ منتظمین کے مطابق اس اجتماع سے عالمی تکنیکی شراکت داری، پالیسی اصلاحات، سرمایہ کاری کے فروغ اور پائیدار مائننگ کے لیے نئی راہیں کھلیں گی۔

پاکستان منرل انویسٹمنٹ فورم کے صدر احمد حیات لک نے کہا کہ پاکستان وسیع معدنی وسائل اور سرمایہ کاری کے بے پناہ مواقع سے مالا مال ایک پرکشش منزل ہے۔ انہوں نے بتایا کہ بین الاقوامی شہرت کی حامل بڑی صنعتی کمپنیاں فورم میں شرکت کریں گی، جہاں عالمی رہنماؤں سے روابط قائم کرنے اور پاکستان کے معدنی شعبے کی صلاحیت کو جانچنے کا موقع میسر آئے گا۔

واضح رہے کہ پاکستان میں تانبے، سونے، کوئلے اور دیگر قیمتی معدنیات کے قابل ذکر ذخائر موجود ہیں، جنہیں بروئے کار لانے کے لیے حکومت غیر ملکی سرمایہ کاری کو ترجیحی بنیادوں پر راغب کرنے کی کوشش کر رہی ہے۔ ماہرین کے مطابق معدنی شعبے میں شفاف پالیسی اور جدید ٹیکنالوجی کی فراہمی ہی اس شعبے کی حقیقی صلاحیت کو اجاگر کر سکتی ہے۔

یہ فورم ایسے وقت میں ہو رہا ہے جب پاکستان معاشی استحکام کے لیے برآمدات اور غیر ملکی سرمایہ کاری کو بڑھانے پر زور دے رہا ہے۔ معدنی وسائل کی قدر میں اضافہ اور ویلیو ایڈیشن کے ذریعے ملکی معیشت کو طویل المدتی فائدہ پہنچنے کی امید ظاہر کی جا رہی ہے۔