پنجاب کے دو حلقوں این اے 77 گوجرانوالہ اور پی پی 203 چیچہ وطنی میں ضمنی انتخابات آج ہوں گے

پنجاب کے دو حلقوں میں ضمنی انتخابات کے لیے آج پولنگ ہو رہی ہے۔ قومی اسمبلی کے حلقے این اے 77 گوجرانوالہ اور صوبائی اسمبلی کے حلقے پی پی 203 چیچہ وطنی میں ووٹنگ کا عمل صبح 8 بجے شروع ہوگا اور بلا تعطل جاری رہے گا۔ الیکشن حکام کے مطابق دونوں حلقوں میں تمام انتظامات مکمل کر لیے گئے ہیں۔

این اے 77 گوجرانوالہ میں مجموعی طور پر 5 لاکھ 18 ہزار 620 رجسٹرڈ ووٹرز اپنا حق رائے دہی استعمال کریں گے، جن میں 2 لاکھ 77 ہزار 480 مرد اور 2 لاکھ 41 ہزار 140 خواتین شامل ہیں۔ اس حلقے میں 333 پولنگ اسٹیشن قائم کیے گئے ہیں، جن میں سے 12 کو انتہائی حساس اور 34 کو حساس قرار دیا گیا ہے۔

امن و امان برقرار رکھنے کے لیے پولیس کے 2 ہزار 982 اہلکار تعینات کیے گئے ہیں، جبکہ رینجرز کے دستے کوئیک رسپانس فورس کے طور پر موجود رہیں گے۔ اس ضمنی انتخاب میں کل 11 امیدوار حصہ لے رہے ہیں۔ مسلم لیگ ن کی جانب سے راشد بشیر ورک میدان میں ہیں، جو مرحوم رکن قومی اسمبلی محمود بشیر ورک کے صاحبزادے ہیں۔ دیگر امیدواروں میں قاضی ابراہیم گجر اور آزاد امیدوار الفت رسول وڑائچ شامل ہیں۔

این اے 77 کی نشست مسلم لیگ ن کے رکن قومی اسمبلی محمود بشیر ورک کے انتقال کے باعث خالی ہوئی تھی۔ اس حلقے میں شہری اور دیہی دونوں علاقے شامل ہیں۔ شہری علاقوں میں شاہین آباد، دھلے، راہوالی اور کنٹونمنٹ بورڈ کے علاقے جبکہ دیہی علاقوں میں قلعہ دیدار سنگھ، لدھیوالہ وڑائچ، پپناکھا اور گوندلانوالہ شامل ہیں۔

دوسری جانب چیچہ وطنی کے صوبائی اسمبلی حلقے پی پی 203 میں بھی ضمنی انتخاب کے لیے پولنگ ہوگی۔ یہ نشست مسلم لیگ ن کے رکن پنجاب اسمبلی چوہدری محمد حنیف جٹ کے انتقال کے باعث خالی ہوئی تھی۔ اس حلقے میں ان کے صاحبزادے چوہدری اسد حنیف جٹ مسلم لیگ ن کے انتخابی نشان شیر پر انتخاب لڑ رہے ہیں۔

واضح رہے کہ ان ضمنی انتخابات میں پاکستان تحریک انصاف نے انتخابی عمل کا بائیکاٹ کیا ہے، جبکہ پاکستان پیپلز پارٹی نے اپنا امیدوار نامزد نہیں کیا۔ الیکشن کمیشن نے دونوں حلقوں میں شفاف اور پرامن پولنگ کے لیے تمام ضروری انتظامات مکمل کرنے کی یقین دہانی کرائی ہے۔