پشاور میں شادی کی تقریبات میں ہوائی فائرنگ کے خلاف کارروائی، دو دولہے گرفتار

پشاور پولیس نے شہر کے مختلف علاقوں میں شادی کی تقریبات کے دوران ہوائی فائرنگ کے واقعات کے خلاف کارروائی کرتے ہوئے دو دولہاؤں سمیت نو افراد کو گرفتار کر لیا ہے۔ پولیس کے مطابق گرفتار افراد میں دولہے اور ان کے سات دوست شامل ہیں، جنہیں مختلف مقامات سے حراست میں لیا گیا۔

پولیس حکام کے مطابق یہ کارروائیاں سٹی پولیس آفیسر (سی سی پی او) پشاور ڈاکٹر میاں سعید احمد کی ہدایت پر کی گئیں۔ کارروائی تھانہ داؤدزئی، بڈھ بیر، ریگی، پشتخرہ، مچنی گیٹ اور انقلاب کی حدود میں کی گئی، جہاں شادی کی تقریبات میں ہوائی فائرنگ کرنے والے ملزمان کو پکڑا گیا۔

پولیس کے مطابق گرفتار افراد کا تعلق بڈھ بیر، گھڑی، شاگئی، سفید ڈھیری اور پٹوار پایاں کے علاقوں سے ہے۔ ملزمان کے قبضے سے ہوائی فائرنگ میں استعمال ہونے والا اسلحہ بھی برآمد کر لیا گیا ہے، جبکہ ان کے خلاف مقدمات درج کر کے مزید تفتیش شروع کر دی گئی ہے۔

سی سی پی او پشاور نے واضح کیا ہے کہ شادی بیاہ کی تقریبات میں ہوائی فائرنگ کے خلاف زیرو ٹالرنس کی پالیسی پر عمل درآمد جاری رہے گا اور کسی کو بھی قانون ہاتھ میں لینے کی اجازت نہیں دی جائے گی۔ انہوں نے کہا کہ ہوائی فائرنگ نہ صرف غیر قانونی ہے بلکہ معصوم شہریوں کی جان و مال کے لیے بھی سنگین خطرہ ہے۔

واضح رہے کہ شادی کی تقریبات میں ہوائی فائرنگ کے باعث اکثر اوقات جانی نقصان کے واقعات رونقِ محفل کو سوگ میں تبدیل کر دیتے ہیں۔ پولیس کی جانب سے یہ مہم ایسے واقعات کو روکنے اور عوام میں قانون کی پاسداری کا شعور بیدار کرنے کے لیے جاری رکھی جائے گی۔