آبنائے ہرمز میں ممنوعہ راستے سے گزرنے والا آئل ٹینکر بارودی سرنگ سے ٹکرا کر آگ کی لپیٹ میں

ایران کی بحریہ نے دعویٰ کیا ہے کہ آبنائے ہرمز کے مشرقی حصے میں ایک تیل بردار جہاز ممنوعہ سمندری حدود میں داخل ہونے کی وجہ سے بحری بارودی سرنگ سے ٹکرا گیا، جس کے نتیجے میں جہاز میں آگ لگ گئی۔ ایرانی فوج کی ویب سائٹ پر جاری ایک بیان کے مطابق یہ واقعہ ہفتے کی صبح پیش آیا، جب جہاز نے اپنا نیویگیشن سسٹم بند کر رکھا تھا اور انتباہ کو نظرانداز کرتے ہوئے اس غیر محفوظ علاقے سے گزرنے کی کوشش کی۔

ایرانی بحریہ کے مطابق جہاز کو پہلے ہی خبردار کیا گیا تھا کہ یہ سمندری راستہ ممنوعہ اور غیر محفوظ ہے، تاہم وارننگ کو نظرانداز کرنے کے نتیجے میں یہ حادثہ پیش آیا۔ ایرانی فوج نے متنبہ کیا ہے کہ آئندہ بھی جو جہاز ممنوعہ حدود میں داخل ہوں گے یا بحریہ کی ہدایات کو نظرانداز کریں گے، انہیں اسی طرح کے نتائج کا سامنا کرنا پڑ سکتا ہے۔

ایرانی بحریہ نے زور دیا کہ آبنائے ہرمز میں محفوظ آمدورفت کے لیے مقررہ سمندری راستوں اور حفاظتی ہدایات پر عمل کرنا لازمی ہے۔ تاہم ایرانی حکام نے متاثرہ جہاز کا نام، اس کی ملکیت، پرچم، عملے کی تعداد یا ممکنہ جانی نقصان کے بارے میں کوئی تفصیلات فراہم نہیں کیں۔

واقعے اور بارودی سرنگ سے ٹکرانے کے ایرانی دعوے کی آزادانہ تصدیق بھی تاحال نہیں ہو سکی ہے۔ آبنائے ہرمز عالمی تجارت اور تیل کی ترسیل کے لیے انتہائی اہم سمندری گزرگاہ ہے، جہاں سے دنیا بھر کی بڑی مقدار میں خام تیل اور توانائی کی مصنوعات مختلف ممالک تک پہنچائی جاتی ہیں۔

یہ واقعہ ایسے وقت سامنے آیا ہے جب خطے میں سمندری تحفظات اور تجارتی راستوں کی حفاظت کے حوالے سے حساسیت بڑھی ہوئی ہے۔ ماہرین کے مطابق آبنائے ہرمز میں کسی بھی قسم کی خلل اندازی عالمی منڈیوں خصوصاً توانائی کی قیمتوں پر اثر انداز ہو سکتی ہے۔