امریکا کا ایران کے خلاف نیا ٹاسک فورس آئرن گیٹ قائم کرنے کا اعلان

امریکی سینٹرل کمانڈ (سینٹ کام) نے ایران کے خلاف اپنی پابندیوں اور نگرانی کے دائرہ کار کو مزید وسیع کرتے ہوئے ’ٹاسک فورس آئرن گیٹ‘ کے قیام کا اعلان کیا ہے۔ سینٹ کام کے مطابق یہ ٹاسک فورس ایران کے زمینی راستوں اور بحیرہ کیسپین کے ذریعے جدید ہتھیاروں اور دیگر ممنوعہ سامان کی نقل و حرکت روکنے کے لیے کام کرے گی۔

سینٹ کام کے سربراہ ایڈمرل بریڈ کوپر نے اس نئے ٹاسک فورس کے قیام کی ہدایت جاری کی ہے، جس میں تقریباً 20 فوجی اور سویلین اہلکار شامل ہوں گے۔ اس کا مرکزی دفتر امریکی ریاست فلوریڈا کے شہر ٹمپا میں قائم کیا جائے گا۔

ٹاسک فورس آئرن گیٹ امریکی حکومت کے دیگر متعلقہ اداروں کے ساتھ مل کر کام کرے گی اور ایران کی زمینی سرحدوں اور بحیرہ کیسپین کے راستے جدید ہتھیاروں، دوہرے استعمال کی ٹیکنالوجی، پابندیوں کے تحت آنے والے مواد اور غیر قانونی مالی ذرائع کی نقل و حرکت روکنے کی کوشش کرے گی۔

ایڈمرل بریڈ کوپر نے کہا ہے کہ ٹاسک فورس آئرن گیٹ کا قیام سمندری ناکہ بندی کی کامیابی کو مزید مضبوط بنانے کی کوشش ہے۔ ان کے مطابق امریکی اداروں کے درمیان تعاون بڑھانے سے ایران کی دہشت گردی کی مالی معاونت، اسلحہ ساز فیکٹریوں کی دوبارہ تعمیر اور فوجی سازوسامان کی فراہمی کی صلاحیت محدود کرنے میں مدد ملے گی۔

امریکی فوج کے مطابق ایران کی بندرگاہوں پر عائد بحری ناکہ بندی کے نتیجے میں حالیہ مہینوں کے دوران ایران کو 25 ارب ڈالر سے زائد مالیت کا خام تیل برآمد کرنے سے روکا جا چکا ہے۔ نئے ٹاسک فورس کا قیام اس بات کی نشاندہی کرتا ہے کہ واشنگٹن اب سمندری راستوں کے ساتھ ساتھ ایران کے زمینی تجارتی اور رسدی راستوں پر بھی پابندیوں کے نفاذ اور نگرانی کو وسعت دینا چاہتا ہے۔