خیبرپختونخوا میں فائرنگ اور ڈرون حملوں کے واقعات، ایک پولیس اہلکار شہید، تین زخمی

خیبرپختونخوا کے مختلف اضلاع میں فائرنگ، ڈرون حملوں اور دستی بم پھینکنے کے واقعات میں ایک پولیس اہلکار شہید جبکہ تین زخمی ہوگئے۔ اطلاعات کے مطابق شہید اہلکار کا کمسن بیٹا بھی شدید زخمی ہوا ہے۔

ضلع ٹانک میں نامعلوم مسلح افراد نے فائرنگ کر کے پولیس اہلکار کو نشانہ بنایا۔ شہید اہلکار کی شناخت سعادت خان کے نام سے ہوئی، جو سی سی پی او آفس پشاور میں سینئر کلرک کے عہدے پر تعینات تھے اور چھٹی پر گھر آئے ہوئے تھے۔ بتایا گیا ہے کہ وہ اپنے بیٹے کے ہمراہ بازار سے سودا سلف لے کر گھر واپس جا رہے تھے کہ محلہ خدریانوالہ میں انہیں نشانہ بنایا گیا۔ زخمی بچے کو اسپتال منتقل کر دیا گیا ہے اور واقعے کے بعد علاقے میں خوف و ہراس پھیل گیا۔

ٹانک کے تھانہ صدر کی حدود کڑی عاشقی میں نامعلوم افراد نے ڈرون سے فائر کیا، جس کا گولا کامران خان نامی شخص کے مکان پر گرا۔ اس واقعے میں مکان اور ایک کمرے کو شدید نقصان پہنچا جبکہ دو بکریاں ہلاک ہوگئیں۔ خوش قسمتی سے کسی جانی نقصان کی اطلاع نہیں ہے کیونکہ واقعے کے وقت بچے اسکول میں موجود تھے۔

ضلع بنوں کی تحصیل ڈومیل کے علاقے اتوار میلہ (کاشو نالہ) کے قریب ڈومیل چوکی محمد خان پر مبینہ کواڈ کاپٹر حملہ کیا گیا، جس کے نتیجے میں ابتدائی اطلاعات کے مطابق تین پولیس اہلکار زخمی ہوگئے۔ ریسکیو 1122 کی طبی ٹیم نے زخمی اہلکاروں کو ابتدائی طبی امداد فراہم کرنے کے بعد خلیفہ گل نواز ہسپتال منتقل کر دیا۔

جنوبی وزیرستان کی تحصیل توئی کے خولہ بازار میں دستی بم حملے کی کوشش ناکام ہوگئی۔ ذرائع کے مطابق ایک نامعلوم شخص نے اس مقام پر دستی بم پھینکا جہاں پولیس اہلکار عموماً بیٹھتے ہیں، تاہم بم پھٹ نہیں سکا۔

واضح رہے کہ صوبے میں حالیہ عرصے میں سکیورٹی فورسز اور پولیس کو نشانہ بنانے کے واقعات میں اضافہ دیکھا گیا ہے۔ متعلقہ حکام کی جانب سے ان واقعات کی تحقیقات اور علاقوں میں حفاظتی اقدامات کی تفصیلات اب تک جاری نہیں کی گئیں۔