شام نے یمن میں حوثیوں کے خلاف فوج بھیجنے کی خبروں کی تردید کر دی

شام نے یمن میں سعودی قیادت والے اتحاد کے ساتھ مل کر حوثی باغیوں کے خلاف کارروائی کے لیے اپنے فوجی دستے بھیجنے کی خبروں کی تردید کرتے ہوئے انہیں بے بنیاد قرار دیا ہے۔ شامی سرکاری خبر رساں ادارے سانا کے مطابق ایک سفارتی ذریعے نے واضح کیا کہ موجودہ حالات میں یمن میں شامی فوجیوں کی تعیناتی کی اطلاعات کی کوئی حقیقت نہیں۔

سفارتی ذرائع کے مطابق شام کی موجودہ ترجیحات میں داخلی سلامتی کا استحکام، ملک کی تعمیر نو اور معاشی بحالی شامل ہیں۔ ان کا کہنا ہے کہ سعودی عرب کے ساتھ فوجی تعاون کا دائرہ فی الحال تربیت، عسکری صلاحیتوں میں اضافے اور فوجی تجربات کے تبادلے تک محدود ہے اور اسے یمن کی جنگ سے کوئی تعلق نہیں۔

ذرائع کے مطابق سعودی حکام آئندہ ماہ شام کے دورے شروع کریں گے جن کے دوران دونوں ممالک کے درمیان فوجی تعاون کو مزید آگے بڑھانے پر بات چیت متوقع ہے۔ مستقبل میں یہ تعاون باہمی دفاعی معاہدے کی صورت اختیار کر سکتا ہے یا پھر مکہ دفاعی اتحاد میں شام کی شمولیت کا سبب بن سکتا ہے۔

دوسری جانب خبر رساں ادارے اے ایف پی نے متعدد یمنی ذرائع کے حوالے سے دعویٰ کیا ہے کہ شامی فوجی اہلکار پہلے ہی یمن اور سعودی عرب میں موجود ہیں۔ ان اطلاعات اور شامی حکومت کی تردید کے درمیان واضح تضاد پایا جاتا ہے جس کی آزادانہ تصدیق ممکن نہیں ہو سکی۔

قبل ازیں خبر رساں ادارے رائٹرز نے بھی رپورٹ کیا تھا کہ شامی فوجی اہلکاروں کی ایک محدود تعداد کو عسکری مشاورت اور تربیت کے لیے سعودی عرب بھیجا گیا ہے۔ اس رپورٹ میں دو شامی فوجی ذرائع اور ایک سینئر امریکی عہدیدار کا حوالہ دیا گیا تھا۔

واضح رہے کہ شام اور سعودی عرب کے درمیان حال ہی میں دفاعی تعاون کا ایک معاہدہ بھی طے پایا ہے جس کے تحت تربیت، مشاورت اور عسکری تجربات کے تبادلے پر اتفاق کیا گیا ہے۔ یمن کی جنگ کے حوالے سے شام کا موقف اس وقت اہمیت اختیار کر گیا ہے جب خطے میں دفاعی اور سفارتی روابط تیزی سے تبدیل ہو رہے ہیں۔