لاہور میں اسموگ کے خلاف 13 کلومیٹر سائیکل ریلی، خواتین اور بچوں کی شرکت

لاہور میں فضائی آلودگی اور اسموگ کے خاتمے کے لیے آگاہی سائیکل ریلی کا انعقاد کیا گیا، جس کا اہتمام لاہور ٹریفک پولیس اور ضلعی انتظامیہ نے مشترکہ طور پر کیا۔ اس ریلی میں سٹی ٹریفک آفیسر (سی ٹی او) لاہور سید عبدالرحیم شیرازی، ڈپٹی کمشنر لاہور، خواتین، بچوں اور شہریوں کی کثیر تعداد نے شرکت کی۔

ریلی کا آغاز لبرٹی مارکیٹ سے ہوا اور یہ 13 کلومیٹر طویل راستہ طے کرتے ہوئے سی بی ڈی، کلمہ چوک، قذافی اسٹیڈیم، لبرٹی، مین بلیوارڈ گلبرگ اور صدیق ٹریڈ سینٹر سے گزری اور دوبارہ لبرٹی مارکیٹ پہنچ کر اختتام پذیر ہوئی۔ لاہور ٹریفک پولیس کی لیڈی وارڈنز کے دستے نے ریلی کی قیادت کی۔

اس موقع پر سی ٹی او لاہور سید عبدالرحیم شیرازی نے کہا کہ سائیکلنگ کو فروغ دے کر نہ صرف فضائی آلودگی میں کمی لائی جا سکتی ہے بلکہ صحت مند معاشرے کی بنیاد بھی رکھی جا سکتی ہے۔ انہوں نے شہریوں پر زور دیا کہ وہ مختصر فاصلوں کے لیے موٹر سائیکل اور گاڑی کے بجائے سائیکل کو ترجیح دیں تاکہ ماحولیاتی آلودگی میں کمی آئے۔

انہوں نے مزید کہا کہ اسموگ کے تدارک کے لیے انفرادی اور اجتماعی سطح پر ذمہ داری کا مظاہرہ کرنا ہوگا، کیونکہ اسموگ کے خلاف جنگ صرف حکومتی اداروں کی ذمہ داری نہیں بلکہ ہر شہری کو اپنا کردار ادا کرنا ہوگا۔ ان کا کہنا تھا کہ ٹریفک قوانین کی پابندی محض قانونی تقاضا نہیں بلکہ انسانی جانوں کے تحفظ کی ضمانت بھی ہے۔ صاف فضا، محفوظ سڑکیں اور صحت مند معاشرے کی تشکیل ہم سب کی مشترکہ ذمہ داری ہے۔

سی ٹی او لاہور نے کہا کہ ریلی میں خواتین کی شرکت ماحول دوست طرز زندگی اور خواتین کی خودمختاری کا مثبت پیغام ہے۔ لاہور ٹریفک پولیس شہریوں میں روڈ سیفٹی اور ماحولیاتی تحفظ سے متعلق شعور اجاگر کرنے کے لیے سرگرم عمل ہے۔

واضح رہے کہ لاہور سمیت پنجاب کے کئی شہروں میں سموگ ایک سنگین مسئلہ ہے، جس کے باعث سانس اور دل کی بیماریوں میں اضافہ ہوتا ہے۔ ماہرین ماحولیات کا کہنا ہے کہ درختوں کی کٹائی، گاڑیوں کا دھواں اور صنعتی اخراج اسموگ کے اہم عوامل ہیں، اور اس کے خاتمے کے لیے طویل المدتی اقدامات کے ساتھ عوامی آگاہی بھی ضروری ہے۔