کراچی میں نامعلوم سمت سے فائرنگ، تین خواتین زخمی

کراچی میں نامعلوم سمت سے چلنے والی گولیوں کا سلسلہ بدستور جاری ہے، جہاں مختلف علاقوں میں گھروں کے اندر گولی لگنے کے واقعات میں تین خواتین زخمی ہو گئیں۔ زخمی خواتین کو فوری طبی امداد کے لیے اسپتال منتقل کر دیا گیا ہے۔

پولیس کے مطابق کورنگی کے علاقے سو کوارٹر گلی نمبر 16 میں گھر کے اندر فائرنگ سے 25 سالہ مومنہ زخمی ہوئیں۔ ابراہیم حیدری پولیس کا کہنا ہے کہ یہ واقعہ نامعلوم سمت سے آنے والی گولی لگنے کے باعث پیش آیا۔

اسی طرح پیر آباد کے علاقے میانوالی کالونی قصبہ میں گھر کے اندر فائرنگ سے 45 سالہ زنتانیہ زخمی ہوئیں، جبکہ اتحاد ٹاؤن کے علاقے امیر معاویہ چوک کے قریب ایک گھر میں فائرنگ سے 30 سالہ صائمہ زخمی ہو گئیں۔ دونوں خواتین کو طبی امداد کے لیے عباسی شہید اسپتال اور سول اسپتال منتقل کیا گیا۔

متعلقہ تھانوں کی پولیس کا کہنا ہے کہ دونوں واقعات نامعلوم سمت سے آنے والی گولیوں کے نتیجے میں پیش آئے ہیں اور اس حوالے سے مزید تفتیش کی جا رہی ہے۔ پولیس نے گولیوں کی سمت اور ذریعے کا تعین کرنے کے لیے تحقیقات شروع کر دی ہیں۔

واضح رہے کہ کراچی میں اس نوعیت کے واقعات شہریوں کی سلامتی کے حوالے سے تشویش کا باعث بنتے ہیں، کیونکہ نامعلوم سمت سے آنے والی گولیاں عام شہریوں کے گھروں میں داخل ہو کر جانی نقصان کا سبب بن سکتی ہیں۔

پولیس حکام نے شہریوں سے اپیل کی ہے کہ وہ کسی بھی مشکوک حرکت یا واقعے کی فوری اطلاع متعلقہ تھانے کو دیں تاکہ بروقت کارروائی ممکن ہو سکے۔