واٹس ایپ کا نیا فیچر: چیٹ کھولے بغیر پیغامات پڑھنے کی سہولت، بلیو ٹک بھی ظاہر نہیں ہوگا

واٹس ایپ صارفین کے لیے ایک نئی سہولت پر کام کر رہا ہے جس کے تحت کسی چیٹ کو کھولے بغیر اس کے حالیہ پیغامات دیکھے جا سکیں گے اور پیغام پڑھنے کی صورت میں بھیجنے والے کو بلیو ٹک ظاہر نہیں ہوگا۔ یہ انکشاف واٹس ایپ کے نئے بیٹا ورژن سے متعلق ایک رپورٹ میں کیا گیا ہے۔

ٹیکنالوجی ویب سائٹ WABetaInfo کے مطابق یہ فیچر اینڈرائیڈ صارفین کے لیے تیار کیا جا رہا ہے اور اسے ’کانٹیکسچوئل مینیو‘ کا نام دیا گیا ہے۔ یہ مینیو ہوم اسکرین پر کسی چیٹ کو کچھ دیر دبا کر رکھنے سے سامنے آئے گا، جہاں معمول کے اختیارات کے ساتھ ایک پریویو کارڈ بھی شامل ہوگا جس میں منتخب چیٹ کے تازہ پیغامات دیکھے جا سکیں گے۔

اس مینیو میں چیٹس کو ان ریڈ مارک کرنے، پن کرنے اور آرکائیو کرنے کی سہولتیں بھی دی جائیں گی۔ اس کے علاوہ چیٹ لاک کرنے، کسی فہرست میں شامل کرنے، چیٹ کی معلومات دیکھنے اور ہوم اسکرین پر شارٹ کٹ بنانے کے اختیارات بھی فراہم کیے جائیں گے۔

اس فیچر کی خاص بات یہ ہے کہ پریویو میں پیغام پڑھنے کے باوجود بھیجنے والے کے پاس بلیو ٹک ظاہر نہیں ہوگا۔ پیغام کو پڑھا ہوا صرف اس وقت شمار کیا جائے گا جب صارف متعلقہ چیٹ کو باقاعدہ طور پر کھولے گا۔ اس طرح صارفین بغیر کوئی نشان چھوڑے پیغامات کا جائزہ لے سکیں گے۔

واضح رہے کہ یہ سہولت فی الحال آزمائشی بیٹا ورژن میں سامنے آئی ہے، اس لیے یہ بات ابھی تک واضح نہیں کہ یہ فیچر تمام صارفین تک کب تک پہنچے گا۔ عام طور پر واٹس ایپ بیٹا ورژن میں آزمائے جانے والے فیچرز کو کچھ عرصے بعد مستحکم ورژن میں شامل کیا جاتا ہے، تاہم کمپنی کی جانب سے اس حوالے سے کوئی سرکاری اعلان سامنے نہیں آیا۔

یاد رہے کہ واٹس ایپ گزشتہ کئی برسوں سے صارفین کی پرائیویسی اور سہولت سے متعلق نئے فیچرز متعارف کروا رہا ہے۔ اس سے قبل بھی مختلف بیٹا ورژنز میں ایسی سہولتیں سامنے آتی رہی ہیں جنہیں بعد ازاں عالمی سطح پر جاری کیا گیا۔ صارفین اس نئے فیچر کے باضابطہ اجرا کا انتظار کر رہے ہیں۔