پاکستان نے کوریا کو شکست دے کر 23ویں ایشین ٹیم اسکواش چیمپئن شپ جیت لی

اسلام آباد کے مصحف اسکواش کمپلیکس میں جاری 23ویں ایشین ٹیم اسکواش چیمپئن شپ کے مینز فائنل میں پاکستان نے کوریا کو دو صفر سے شکست دے کر ٹائٹل اپنے نام کر لیا۔ اس کامیابی کے ساتھ ہی پاکستانی ٹیم نے گولڈ میڈل حاصل کیا، جبکہ کوریا کی ٹیم سلور میڈل پر اکتفا کرنے پر مجبور رہی۔

پاکستان کی جانب سے پہلے میچ میں نور زمان نے کوریا کے جیونگمن ریو کو تین صفر کے سکور میں شکست دی۔ اس مقابلے کے سکور 11-5، 11-7 اور 13-11 رہے۔ دوسرے میچ میں محمد عاصم خان نے کوریائی کھلاڑی سیوجن اوہ کو 11-6، 11-5 اور 11-4 کے سکور کے ساتھ تین صفر سے ہرا کر پاکستان کی فتح کو یقینی بنایا۔

مینز مقابلوں میں ملائیشیا اور ہانگ کانگ چائنہ کی ٹیموں نے براؤنز میڈلز حاصل کیے، جبکہ ایران پانچویں اور ازبکستان چھٹی پوزیشن پر رہا۔ اس طرح پاکستان نے اپنی مینز ٹیم کے ساتھ ایشین اسکواش میں اپنی مضبوط پوزیشن کا مظاہرہ کیا۔

خواتین کے فائنل میں ہانگ کانگ چائنہ کی ٹیم نے دفاعی چیمپئن ملائیشیا کو دو ایک سے ہرا کر ٹائٹل جیت لیا۔ ہانگ کانگ چائنہ کی تو لی مہم ٹوبے نے ملائیشیا کی لی ایکسن ینگ کو تین ایک سے، چن سن یک نے اینہ امانی کو تین ایک سے جبکہ ملائیشیا کی یشمیتا جیڈش کمار نے لی کا یی کو تین ایک سے شکست دی۔

خواتین مقابلوں میں پاکستان کی ٹیم کو کوریا کے ہاتھوں تین صفر سے شکست کا سامنا کرنا پڑا اور وہ پانچویں پوزیشن پر رہی۔ کوریا کی ڈیمی کم نے سحرش علی کو، منگیون ہیو نے ثنا بہادر کو اور ہوائیونگ ایوم نے ماہ نور علی کو شکست دی۔ خواتین میں ہانگ کانگ چائنہ نے گولڈ، ملائیشیا نے سلور اور ایران و کوریا نے براؤنز میڈلز حاصل کیے۔

اختتام پر مہمان خصوصی ایشین اسکواش فیڈریشن کے نائب صدر عادل جاسم الغریب نے پاکستان اسکواش فیڈریشن کے سینیئر نائب صدر ایئر وائس مارشل سہیل اکبر، نائب صدر قمر زمان، گوگی علاؤالدین اور جان شیر خان کے ہمراہ انعامات تقسیم کیے۔ یہ ایونٹ پاکستان میں اسکواش کی مقبولیت اور میزبانی کی صلاحیت کو اجاگر کرتا ہے۔