غزہ میں شدید بارش، 70 ہزار بے گھر فلسطینیوں کے خیمے پانی میں ڈوب گئے

غزہ میں سردیوں کی پہلی شدید بارش نے بمباری سے بے گھر ہونے والے فلسطینی خاندانوں کی زندگیوں کو مزید مشکل بنا دیا ہے۔ موسلادھار بارش کے بعد مختلف علاقوں میں قائم خیمہ بستیاں پانی میں ڈوب گئیں جبکہ ہزاروں خاندانوں کے کپڑے، بستر، کمبل اور گدے بھیگ جانے سے متعدد عارضی پناہ گاہیں رہائش کے قابل نہیں رہیں۔

گزشتہ بارہ گھنٹوں کے دوران کم از کم ستر ہزار خیمے بارش کے پانی سے متاثر ہوئے ہیں، جس کے باعث دسیوں ہزار بے گھر افراد کو شدید مشکلات کا سامنا ہے۔ متاثرین میں خواتین، بچوں، بزرگ شہریوں اور بیمار افراد کی بڑی تعداد شامل ہے جن کے پاس سرد موسم میں محفوظ پناہ کا کوئی متبادل انتظام موجود نہیں۔

غزہ کی سول ڈیفنس سروس کے مطابق بارش شروع ہونے کے بعد صرف دس گھنٹوں کے دوران شہریوں کی جانب سے مدد کے لیے تقریباً پندرہ سو ہنگامی کالز موصول ہوئیں۔ متعدد مقامات پر پانی کی سطح تیس سے چالیس سینٹی میٹر تک پہنچ گئی، جس کے بعد خیموں اور عارضی پناہ گاہوں میں مقیم افراد کو محفوظ مقامات کی طرف منتقل ہونا پڑا۔

امدادی ٹیموں کو تیز ہواؤں اور مسلسل بارش کے باعث پانی نکالنے اور خاندانوں کو محفوظ مقامات تک پہنچانے میں دشواری کا سامنا ہے۔ رہائشی سامان کے ضائع ہونے کے ساتھ ساتھ بے گھر افراد کے لیے خوراک، گرم کپڑوں اور ادویات کی فراہمی بھی ایک بڑا چیلنج بن گئی ہے۔

واضح رہے کہ یہ واقعہ غزہ میں جاری انسانی بحران کے پس منظر میں سامنے آیا ہے، جہاں لاکھوں افراد عارضی خیموں میں زندگی گزارنے پر مجبور ہیں۔ موسم سرما کی شدت بڑھنے کے ساتھ ہی ان خاندانوں کی حفاظت اور بنیادی سہولیات کی فراہمی کے لیے فوری امدادی اقدامات کی ضرورت پر زور دیا جا رہا ہے۔