روس میں 5300 سال پرانی قبر سے گردے کی پتھری دریافت

ماہرینِ آثارِ قدیمہ نے جنوب مغربی روس کے علاقے اسٹاوروپول اپ لینڈ میں کانسی دور کے ایک قدیم مقبرے کی کھدائی کے دوران انگور کے برابر گردے یا مثانے کی پتھری دریافت کی ہے۔ محققین کا خیال ہے کہ یہ پتھری تقریباً 5300 سال قبل وفات پانے والے ایک شخص سے تعلق رکھتی ہے، جو انسانی بیماریوں کی تاریخ کا ایک اہم ثبوت ہے۔

تحقیق کے مطابق یہ شخص غالباً پیشاب کی نالی کے دائمی انفیکشن اور اس سے پیدا ہونے والی پیچیدگیوں کا شکار تھا، جس کے باعث اسے زندگی کے آخری برسوں میں مسلسل شدید درد کا سامنا رہا ہوگا۔ یہ دریافت بتاتی ہے کہ قدیم دور میں بھی انسان ایسی بیماریوں میں مبتلا ہوتے تھے جن کا علاج آج جدید طبی سہولیات سے ممکن ہے۔

اس تحقیق کی مرکزی مصنفہ اور روس کی لومونوسوف ماسکو اسٹیٹ یونیورسٹی سے وابستہ ماہرِ بشریات نتالیہ بریزینا کے مطابق اس شخص کو دائمی انفیکشن کا سامنا تھا، جو کوئی عارضی بیماری نہیں بلکہ طویل عرصے تک برقرار رہنے والی تکلیف تھی۔ انہوں نے کہا کہ یہ پتھری اُس دور کے انسان کی صحت اور بیماریوں کے بارے میں قیمتی معلومات فراہم کرتی ہے۔

یہ مقبرہ قدیم تدفینی روایت کے تحت مٹی کا بڑا ٹیلہ بنا کر تیار کیا گیا تھا جسے کرگن کہا جاتا ہے۔ کھدائی کے دوران ماہرین کو زیرِ زمین ایک قبر نما کمرہ ملا جہاں سے تقریباً 40 سالہ شخص کا ڈھانچہ برآمد ہوا۔ اس کے کولہے کے قریب کوارٹز سے بنا تیر کا پھل بھی دریافت کیا گیا۔

ماہرین کے مطابق قبر سے ملنے والی پتھر جیسی چیز کی ساخت اور جسامت گردے یا مثانے کی پتھری سے مطابقت رکھتی ہے۔ یہ دریافت کانسی دور کے انسانوں کی طرزِ زندگی، خوراک اور طبی مسائل کو سمجھنے میں مددگار ثابت ہو سکتی ہے اور آثارِ قدیمہ کے شعبے میں ایک اہم سنگِ میل قرار دی جا رہی ہے۔

واضح رہے کہ اس طرح کی دریافتوں سے نہ صرف ماضی کے انسانوں کی صحت کے بارے میں معلومات ملتی ہیں بلکہ یہ بھی معلوم ہوتا ہے کہ مختلف بیماریاں کتنی قدیم ہیں۔ محققین کی یہ کاوش عالمی سطح پر سائنسی حلقوں میں دلچسپی کا باعث بنی ہوئی ہے۔