مصر میں دو مسافر ٹرینوں کا تصادم، سات افراد ہلاک اور درجنوں زخمی

مصر کے شمالی حصے میں دو مسافر ٹرینوں کے درمیان شدید تصادم ہوا جس کے نتیجے میں کم از کم سات افراد جان سے گئے جبکہ درجنوں مسافر زخمی ہوگئے۔ حادثے کے بعد ٹرین کی کئی بوگیاں پٹری سے اتر کر الٹ گئیں اور جائے وقوعہ پر افراتفری کی کیفیت پیدا ہوگئی۔

غیر ملکی خبر رساں اداروں کے مطابق حادثے کے بعد سامنے آنے والی ویڈیوز میں الٹی ہوئی بوگیاں اور موقع پر جمع بڑی تعداد میں لوگ دیکھے جا سکتے ہیں۔ امدادی ٹیمیں فوری طور پر متاثرہ مسافروں کو نکالنے اور زخمیوں کو ہسپتال منتقل کرنے میں مصروف رہیں۔

رپورٹس کے مطابق ایک ٹرین محافظہ الجیزہ سے جنوب مغرب میں واقع فیوم نخلستان کی جانب جا رہی تھی، جبکہ دوسری ٹرین قاہرہ سے ملک کے جنوبی شہر اسوان کی طرف سفر کر رہی تھی۔ دونوں ٹرینوں کے راستے اس مقام پر آپس میں ملتے ہیں جہاں یہ حادثہ پیش آیا۔

اب تک حادثے کی اصل وجوہات سامنے نہیں آ سکیں اور حکام نے واقعے کی تحقیقات کا آغاز کر دیا ہے۔ مصری صدر عبدالفتاح السیسی نے بھی واقعے کی مکمل تحقیقات کا حکم دیا ہے اور کہا ہے کہ حادثے میں غفلت کے مرتکب پائے جانے والے کسی بھی فرد کو جواب دہ ٹھہرایا جائے گا۔

واضح رہے کہ مصر میں ٹرین حادثات ماضی میں بھی پیش آتے رہے ہیں اور ریلوے نظام کی حالت اور حفاظتی انتظامات پر تنقید کا سامنا رہا ہے۔ حکام کی جانب سے ذمہ داروں کے تعین اور آئندہ ایسے واقعات کی روک تھام کے لیے اقدامات کا جائزہ لیا جا رہا ہے۔

زخمیوں کی تعداد میں اضافے کا خدشہ ظاہر کیا جا رہا ہے کیونکہ کچھ مسافر اب بھی ملبے میں پھنسے ہوئے ہیں۔ مقامی حکام نے ہسپتالوں میں ایمرجنسی نافذ کر دی ہے تاکہ زخمیوں کو فوری طبی امداد فراہم کی جا سکے۔