وزیراعظم شہباز شریف آج COP31 سربراہی اجلاس سے خطاب کریں گے، اہم عالمی رہنماؤں سے ملاقاتیں بھی شیڈول

وزیراعظم شہباز شریف اقوام متحدہ کے زیرِ اہتمام منعقدہ ماحولیاتی کانفرنس COP31 کے اعلیٰ سطح اجلاس میں شرکت کے لیے ترکیہ کے شہر انطالیہ میں موجود ہیں، جہاں آج ان کا دن انتہائی مصروف رہے گا۔ سرکاری ذرائع کے مطابق وزیراعظم مختلف اعلیٰ سطح اجلاسوں میں شرکت کے ساتھ ساتھ متعدد عالمی رہنماؤں سے دوطرفہ ملاقاتیں بھی کریں گے۔

وزیراعظم ترکیہ کے صدر رجب طیب اردوان کی میزبانی میں ’Clean Energy Transition by 2035: Powering the Future‘ کے عنوان سے ہونے والے اعلیٰ سطح اجلاس میں شرکت کریں گے، جس میں وہ قابلِ تجدید توانائی کے حوالے سے پاکستان کے وژن پر اہم خطاب کریں گے۔ اس موقع پر توانائی کے شعبے میں پائیدار ترقی اور صاف توانائی کی جانب منتقلی پر تبادلہ خیال متوقع ہے۔

اس کے علاوہ وزیراعظم COP31 کے سربراہی اجلاس میں پاکستان کا قومی مؤقف پیش کریں گے، جس میں ماحولیاتی انصاف اور موسمیاتی تبدیلی سے شدید متاثرہ ممالک کے موقف کو عالمی سطح پر اجاگر کیا جائے گا۔ پاکستان کی جانب سے یہ مؤقف عالمی رہنماؤں کے سامنے پیش کیا جائے گا، جس سے ملک کے موسمیاتی چیلنجز اور عالمی برادری کی ذمہ داریوں پر روشنی پڑے گی۔

دن بھر کی مصروفیات کے دوران وزیراعظم مختلف اہم عالمی رہنماؤں سے بھی ملاقاتیں کریں گے، جن میں دوطرفہ تعلقات کے فروغ کے علاوہ ماحولیاتی چیلنجز اور ان کے مشترکہ حل پر تبادلہ خیال کیا جائے گا۔ ان ملاقاتوں کو پاکستان کے لیے سفارتی اور اقتصادی لحاظ سے اہم قرار دیا جا رہا ہے۔

وزیراعظم شام کو ترکیہ کے صدر رجب طیب اردوان کی جانب سے عالمی رہنماؤں کے اعزاز میں دیے جانے والے پروقار گالا ڈنر میں بھی شرکت کریں گے۔ یاد رہے کہ COP31 کانفرنس موسمیاتی تبدیلی کے حوالے سے عالمی سطح پر ایک اہم فورم سمجھی جاتی ہے، جہاں ترقی پذیر ممالک اپنے موقف کے اظہار اور عالمی تعاون کو مضبوط بنانے کے لیے کردار ادا کرتے ہیں۔