وزیراعظم شہباز شریف کوپ 31 سربراہی اجلاس میں شرکت کے لیے انطالیہ پہنچ گئے

وزیراعظم محمد شہباز شریف اقوام متحدہ کے فریم ورک کنونشن برائے موسمیاتی تبدیلی کے تحت منعقدہ فریقین کی 31ویں کانفرنس یعنی کوپ 31 کے عالمی رہنماؤں کے سربراہی اجلاس میں شرکت کے لیے ترکیہ کے شہر انطالیہ پہنچ گئے ہیں۔ انطالیہ ہوائی اڈے پر پہنچنے پر ترکیہ کے نائب وزیر برائے ثقافت و سیاحت گوکھان یازگی، ترکیہ میں پاکستان کی نامزد سفیر آمنہ بلوچ اور دیگر اعلیٰ حکام نے ان کا استقبال کیا۔

سربراہی اجلاس سے خطاب کرتے ہوئے وزیراعظم پاکستان کی موسمیاتی ترجیحات کو اجاگر کریں گے اور موسمیاتی تبدیلی کے منفی اثرات سے نمٹنے کے لیے عالمی سطح پر فوری اور مؤثر اقدامات کی ضرورت پر زور دیں گے۔ وہ طے شدہ بین الاقوامی اصولوں کے مطابق تعاون کو مزید مضبوط بنانے پر بھی بات کریں گے۔

وزیراعظم مستقبل کے لیے قابل تجدید توانائی کی جانب منتقلی اور بجلی کے فروغ سے متعلق ایک اعلیٰ سطحی مکالمے سے بھی خطاب کریں گے، جس سے پاکستان کے صاف توانائی کے شعبے میں عزم کا اظہار ہوگا۔

اجلاس کے موقع پر وزیراعظم کی ترکیہ کے صدر رجب طیب اردوان سمیت مختلف عالمی رہنماؤں سے دوطرفہ ملاقاتیں بھی متوقع ہیں جن میں باہمی دلچسپی کے امور اور دوطرفہ تعاون کے فروغ پر تبادلہ خیال کیا جائے گا۔ اس کے علاوہ کوپ 31 کے دوران پاکستان پویلین بھی قائم کیا گیا ہے جہاں مختلف موضوعات پر 54 تقریبات منعقد کی جائیں گی۔

واضح رہے کہ گزشتہ کوپ کانفرنسوں میں پاکستان کی فعال موسمیاتی سفارت کاری کو اہم کامیابی قرار دیا جاتا ہے، جس کے نتیجے میں کوپ 27 کے دوران لاس اینڈ ڈیمیج فنڈ کی منظوری عمل میں آئی تھی۔ یہ فنڈ موسمیاتی آفات سے متاثرہ ترقی پذیر ممالک کے لیے مالی معاونت فراہم کرنے کے لیے قائم کیا گیا تھا۔