عثمان خواجہ کا لارڈز ٹیسٹ میں نسل پرستانہ رویے سے متعلق انکشاف

آسٹریلوی سابق ٹیسٹ کرکٹر عثمان خواجہ نے اپنی تازہ شائع شدہ خود نوشت ’صبر‘ میں 2023 کی ایشز سیریز کے دوران لارڈز ٹیسٹ سے متعلق اہم انکشافات کیے ہیں۔ ان کے مطابق اس میچ میں جونی بیئرسٹو کے متنازع رن آؤٹ کے بعد میریلیبون کرکٹ کلب (ایم سی سی) کے کچھ ارکان نے آسٹریلوی کھلاڑیوں کے خلاف نازیبا زبان استعمال کی اور نسل پرستانہ جملے بھی کسے۔

خواجہ نے کتاب میں تفصیل دی ہے کہ لنچ کے وقفے میں جب آسٹریلوی کھلاڑی پویلین کی طرف واپس جا رہے تھے تو لارڈز کے لانگ روم میں موجود بعض ایم سی سی ارکان نے انہیں گالیاں دیں اور ان کے خلاف نازیبا گفتگو کی۔ اسکائی اسپورٹس کی نشر کردہ فوٹیج میں بھی دیکھا گیا تھا کہ خواجہ ایک رکن کے سامنے رک کر بات کرتے ہیں اور بعد ازاں اسٹیورڈز کو دوسرے رکن کے رویے سے آگاہ کرتے ہیں۔

سابق ٹیسٹ اوپنر کے مطابق ایک موقع پر انہیں خاموش رہنے اور منہ بند کرنے کا کہا گیا، تاہم وہ یقین سے نہیں بتا سکے کہ یہ الفاظ کس رکن نے کہے۔ انہوں نے لکھا کہ ان ارکان نے اپنا اصل کردار ظاہر کر دیا تھا اور وہ آسٹریلوی کھلاڑیوں کو گالیاں دیتے ہوئے ایسا رویہ اختیار کر رہے تھے جیسے وہ کوئی خاص مراعات یافتہ گروہ ہوں۔

واضح رہے کہ لارڈز ٹیسٹ کے فوری بعد ایم سی سی نے نامناسب رویے پر تین ارکان کو معطل کر دیا تھا۔ تحقیقات کے بعد چار ماہ بعد ایک رکن کو کلب سے نکال دیا گیا جبکہ دو دیگر ارکان پر بالترتیب ساڑھے چار سال اور ڈھائی سال کی پابندی عائد کی گئی تھی۔

یہ انکشافات اس وقت سامنے آئے ہیں جب آسٹریلیا کی قومی ٹیم کے سابق کھلاڑی کی کتاب نے کرکٹ حلقوں میں بحث کو جنم دیا ہے۔ واقعے کی ابتدائی رپورٹنگ اور ایم سی سی کی جانب سے کی گئی کارروائی پہلے ہی عوامی سطح پر موجود تھی، تاہم خواجہ کی کتاب میں دی گئی تفصیلات نے اس معاملے کو دوبارہ توجہ کا مرکز بنا دیا ہے۔