ایران کا قطر میں امریکا کے ساتھ مذاکرات کے دعووں کی تردید

ایران کی سپریم نیشنل سیکیورٹی کونسل کے سیکریٹری میجر جنرل محسن رضائی نے امریکا کے ساتھ قطر میں مذاکرات کے حالیہ دعووں کو سختی سے مسترد کر دیا ہے۔ ایرانی میڈیا کے مطابق ایک مقامی ٹیلی ویژن کو خصوصی انٹرویو میں انہوں نے کہا کہ واشنگٹن کی جانب سے مذاکرات کے جاری رہنے یا قطر میں ملاقات ہونے کا دعویٰ سراسر جھوٹ ہے اور اس کا کوئی حقیقی بنیاد نہیں۔

ان کا کہنا تھا کہ امریکا ان دعووں کے ذریعے دو مقاصد حاصل کرنا چاہتا ہے؛ ایک طرف اپنے اقتصادی دباؤ کو کم کرنا اور دوسری طرف عالمی منڈی میں تیل کی قیمتوں کو نیچے لانا۔ محسن رضائی نے واضح کیا کہ اس وقت ایران اور واشنگٹن کے درمیان کوئی بات چیت نہیں ہو رہی اور نہ ہی کوئی مذاکراتی عمل جاری ہے۔

آبنائے ہرمز کے حوالے سے اپنا موقف دہراتے ہوئے انہوں نے کہا کہ تہران نے سات مخصوص شرائط پیش کی ہیں جنہیں ایرانی قوم کے ناقابل تردید حقوق قرار دیا جا سکتا ہے۔ انہوں نے تصدیق کی کہ یہ شرائط پہلے ہی امریکا تک پہنچا دی گئی ہیں، تاہم واشنگٹن کے ردعمل پر انہوں نے سوال اٹھایا۔

ایران کے سیکیورٹی سربراہ نے ان افواہوں کو بھی مسترد کیا جن میں یہ کہا جا رہا تھا کہ ان کی امریکی نائب صدر جے ڈی وینس سے ملاقات طے ہے۔ انہوں نے ان قیاس آرائیوں کو بالکل بے بنیاد اور جھوٹا قرار دیتے ہوئے کہا کہ اس وقت ایسی کوئی ملاقات یا رابطہ زیر غور نہیں ہے۔

واضح رہے کہ میڈیا رپورٹس میں یہ تاثر دیا جا رہا تھا کہ امریکا اور تہران کے درمیان مذاکرات کے حوالے سے سفارتی پیش رفت کا امکان موجود ہے۔ ایرانی حکام کی جانب سے اس تردید کے بعد یہ قیاس آرائیاں کمزور پڑ گئی ہیں، جبکہ خطے میں اقتصادی پابندیوں اور تیل کی منڈی کے حوالے سے صورتحال پر نظر رکھی جا رہی ہے۔