چشمہ 5: پاکستان کا سب سے بڑا نیوکلیئر پاور پلانٹ، وزیراعظم کا اہم سنگ میل قرار

وزیراعظم شہباز شریف نے میانوالی میں چین کے تعاون سے تعمیر ہونے والے پاکستان کے سب سے بڑے نیوکلیئر پاور پلانٹ چشمہ فائیو کے پانچویں یونٹ کے ڈوم کی تنصیب کا افتتاح کیا اور اسے ایک قابل فخر سنگ میل قرار دیا۔ انہوں نے کہا کہ یہ منصوبہ عوام کو سستی، قابل اعتماد اور ماحول دوست بجلی فراہم کرنے میں اہم کردار ادا کرے گا۔

وزیراعظم نے اس موقع پر خطاب کرتے ہوئے کہا کہ ڈوم کی تنصیب پاک چین دوستی اور باہمی عزم کی علامت ہے۔ ان کا کہنا تھا کہ پاکستان توانائی کے تحفظ اور سستی بجلی کی فراہمی کے معاملے میں اپنا کردار ادا کرے گا اور ملک کو معاشی طور پر مضبوط بنانے کے لیے مقامی وسائل اور انسانی سرمائے سے بھرپور فائدہ اٹھانا ہوگا۔

پاکستان اٹامک انرجی کمیشن نے چشمہ نیوکلیئر پاور پلانٹ کے یونٹ سی فائیو کے ڈوم کی کامیاب تنصیب کے ساتھ منصوبے کی تعمیر میں ایک اہم سنگ میل عبور کر لیا ہے۔ وزیراعظم نے یاد دلایا کہ جولائی 2023 میں اس منصوبے کا سنگ بنیاد رکھتے وقت انہوں نے یقین دلایا تھا کہ پاکستان کسی کا انتظار نہیں کرے گا بلکہ اپنی محنت سے اپنا مستقبل خود تعمیر کرے گا، اور آج ساڑھے تین سال سے بھی کم عرصے میں مقررہ وقت سے پہلے ڈوم کی تنصیب اس عزم کی عملی عکاسی ہے۔

انہوں نے پاکستان اور چین کے انجینئرز، تکنیکی ماہرین اور کارکنوں کی خدمات، لگن اور محنت کو سراہتے ہوئے امید ظاہر کی کہ یہ منصوبہ مقررہ وقت سے پہلے فعال ہو جائے گا، جس سے عوام کو صاف اور سستی بجلی کی فراہمی ممکن ہوگی اور درآمدی ایندھن کی قیمتوں پر انحصار کم ہوگا۔ وزیراعظم کا کہنا تھا کہ سستی بجلی کی پیداوار سورج کی روشنی یا ہوا کی دستیابی سے مشروط نہیں ہونی چاہیے بلکہ اس سے رات بھر فیکٹریاں چلتی رہیں، اسپتالوں میں بجلی کی فراہمی یقینی بنے اور طلبہ کو روشنی میں تعلیم حاصل کرنے کا موقع ملے۔

وزیراعظم نے کہا کہ موسمیاتی تبدیلیوں سے متاثرہ ملک کی حیثیت سے پاکستان کی ذمہ داری ہے کہ توانائی کے ایسے حل تلاش کیے جائیں جو معاشی مقاصد کے حصول کے ساتھ ماحول کا تحفظ بھی یقینی بنائیں۔ انہوں نے کہا کہ کسی بھی قوم کی خوشحال مستقبل کی بنیاد امن و استحکام پر ہے اور ملکی ترقی کے لیے توانائی کے شعبے میں خودکفالت اور جدید ٹیکنالوجی کا استعمال ناگزیر ہے۔