ایران کا نئی میزائل سٹی کا افتتاح، فوجی سربراہ کی دھمکیاں

ایران کی مسلح افواج کے چیف آف اسٹاف میجر جنرل علی عبداللہی نے پاسداران انقلاب کی ایرو اسپیس فورس کی نئی میزائل سٹی کا افتتاح کیا ہے۔ ایرانی میڈیا کے مطابق افتتاح کی تقریب میں ایرو اسپیس فورس کے کمانڈر بریگیڈیئر جنرل سید ماجد موسوی بھی موجود تھے۔ اس موقع پر جنرل عبداللہی نے فورس کے افسران اور اہلکاروں کو ملک کے حقیقی ہیروز قرار دیا۔

جنرل عبداللہی نے کہا کہ ایران نے اپنے دشمنوں کے خلاف لڑتے ہوئے مثالی کامیابی حاصل کی ہے۔ انہوں نے دعویٰ کیا کہ امریکا نے کسی بھی دوسری جنگ میں اس دورانیے میں اتنے جدید ہتھیار اور اتنے بڑے پیمانے پر گولہ بارود استعمال نہیں کیا۔ ان کا کہنا تھا کہ اگلی جنگ میں ایک کے بعد ایک حیران کن سرپرائز سامنے آئیں گے۔

فوجی سربراہ نے مزید کہا کہ کسی بھی جنگ کا فیصلہ کن پہلو اسلحے، گولہ بارود یا فوجی وسائل نہیں ہوتا بلکہ قوم کا اپنے ملک کے دفاع کا عزم ہوتا ہے۔ انہوں نے کہا کہ مسلح افواج کسی بھی مخالف کے سامنے ڈٹ کر کھڑی رہے گی، چاہے اس کی تعداد یا فوجی صلاحیتیں کتنی ہی زیادہ کیوں نہ ہوں۔

ایرانی میڈیا کی رپورٹ کے مطابق نئی میزائل سٹی ایرو اسپیس فورس کے میزائل انفراسٹرکچر کا ایک اور حصہ ہے، جس کا مقصد میزائل یونٹس کی آپریشنل صلاحیتوں کو مضبوط کرنا اور ممکنہ خطرات سے نمٹنے کے لیے ان کی تیاری برقرار رکھنا ہے۔ یہ منصوبہ ایران کی جانب سے دفاعی صلاحیتوں کو مسلسل بہتر بنانے کی کوششوں کے تحت سامنے آیا ہے۔

جنرل عبداللہی نے امریکہ اور اسرائیل پر الزام عائد کرتے ہوئے کہا کہ دونوں ممالک نے اپنی صلاحیتوں کو آزما لیا ہے لیکن اپنے مقاصد حاصل کرنے میں ناکام رہے۔ ان کا دعویٰ تھا کہ ایران کو نقصان پہنچانے کی کوششیں ناکام ہوئیں اور مخالفین کو جنگ کے میدان میں بھاری نقصانات کا سامنا کرنا پڑا۔

واضح رہے کہ یہ بیان ایسے وقت میں سامنے آیا ہے جب خطے میں کشیدگی اور دفاعی دوڑ کے حوالے سے بحث جاری ہے۔ ایران کی جانب سے میزائل صلاحیتوں کی نمائش اور سینئر فوجی حکام کے بیانات بین الاقوامی سطح پر توجہ کا مرکز بنتے رہے ہیں، جبکہ ماہرین ان پیش رفتوں کو علاقائی سلامتی کے تناظر میں اہم قرار دیتے ہیں۔