ایف بی آر کا تاخیر سے انکم ٹیکس گوشوارے جمع کرانے والوں کو سرچارج کے بغیر اے ٹی ایل میں شامل کرنے کا فیصلہ

فیڈرل بورڈ آف ریونیو (ایف بی آر) نے ٹیکس دہندگان کے لیے ایک اہم سہولت کا اعلان کرتے ہوئے انکم ٹیکس رولز 2002 میں مزید ترامیم کر دی ہیں۔ ان ترامیم کے تحت وہ افراد جو مقررہ یا توسیع شدہ تاریخ کے بعد اپنا انکم ٹیکس گوشوارہ جمع کراتے ہیں، انہیں سرچارج ادا کیے بغیر ایکٹو ٹیکس پیئر لسٹ (اے ٹی ایل) میں شامل کیا جائے گا۔ یہ اقدام ایف بی آر کی جانب سے جاری کردہ نوٹیفکیشن کے ذریعے عملی جامہ پہنایا گیا ہے۔

نوٹیفکیشن کے مطابق ایسے انفرادی ٹیکس دہندگان کو آئی آر آئی ایس کے ذریعے فارم اے ٹی ایل یو میں چھ ماہ کا تحریری اقرار نامہ جمع کرانا ہوگا۔ اس اقرار نامے کی رو سے وہ جمع کرانے کی تاریخ سے اگلے چھ ماہ تک کوئی جائیداد خریدنے، حاصل کرنے یا اس میں ملکیتی یا مفاداتی حق حاصل کرنے کے مجاز نہیں ہوں گے۔

ایف بی آر کے مطابق فارم کامیابی سے جمع ہونے پر آئی آر آئی ایس کی جانب سے الیکٹرانک رسید جاری کی جائے گی اور اسی تاریخ سے چھ ماہ کی مدت کا آغاز ہوگا۔ ایف بی آر کو یہ اختیار حاصل ہوگا کہ وہ اقرار نامے کی شرائط پر عمل درآمد کی تصدیق کر سکے اور اس مقصد کے لیے متعلقہ اداروں، ایجنسیوں، رجسٹریوں، مالیاتی اداروں اور دیگر قانونی ذرائع سے معلومات حاصل کر سکے۔

اگر تصدیق کے دوران یہ ثابت ہو جائے کہ متعلقہ فرد نے چھ ماہ کی مدت میں کوئی جائیداد خریدی یا حاصل کی یا اس میں ملکیتی یا مفاداتی حق حاصل کیا تو اسے الیکٹرانک طور پر اپنا موقف پیش کرنے کا موقع دیا جائے گا۔ خلاف ورزی ثابت ہونے کی صورت میں سرچارج سے استثنیٰ کا فائدہ ختم کر دیا جائے گا اور اے ٹی ایل میں شمولیت کا معاملہ سابقہ قواعد کے تحت طے کیا جائے گا۔

فارم میں ٹیکس دہندہ کا نام، شناختی کارڈ یا این ٹی این نمبر، ٹیکس سال، گوشوارہ جمع کرانے کی تاریخ، آئی آر آئی ایس رسید یا ریفرن�� نمبر اور اقرار نامہ جمع کرانے کی تاریخ درج کرنا لازم ہوگا۔ یہ سہولت ان افراد کے لیے دی گئی ہے جو گوشوارہ تاخیر سے جمع کراتے ہیں اور سرچارج کی اضافی ادائیگی کے بوجھ سے بچنا چاہتے ہیں۔

واضح رہے کہ ایف بی آر اس سے قبل بھی انکم ٹیکس گوشوارے جمع نہ کروانے والوں کے خلاف کارروائی شروع کر چکا ہے اور ٹیکس قواعد میں مزید تبدیلیوں کا فیصلہ بھی زیر غور ہے۔ ماہرین کے مطابق یہ ترمیم ٹیکس نیٹ کو وسیع کرنے اور تاخیر سے گوشوارے جمع کرانے والوں کو قانونی دائرے میں لانے کی کوشش ہے۔