کراچی کی معاشی اہمیت اور وفاقی وسائل پر میئر کراچی کے تحفظات

کراچی کے میئر مرتضیٰ وہاب نے کہا ہے کہ شہر ملک کی معیشت میں نمایاں حصہ ڈالتا ہے، لیکن اس کے بدلے میں وفاقی سطح سے اسے جو وسائل ملتے ہیں وہ توقعات کے مطابق نہیں۔ یہ بات انہوں نے نارتھ کراچی انڈسٹریل ایریا میں انفراسٹرکچر کے منصوبوں کے افتتاح کی تقریب میں صنعت کاروں سے خطاب کرتے ہوئے کہی۔

انہوں نے کہا کہ کراچی کی کامیابی سے پورے ملک کی معیشت کو فائدہ پہنچتا ہے، اس لیے شہر کی ترقی کے لیے سب کو مشترکہ ذمہ داری قبول کرنی ہوگی۔ ان کا کہنا تھا کہ شہر نے ماضی میں بھی بڑی مشکلات کا سامنا کیا، اور اب پُرامن اور کاروبار دوست ماحول کو برقرار رکھنا اولین ترجیح ہے۔

میئر کراچی نے کہا کہ صوبائی حکومت تاجروں اور صنعت کاروں کے تحفظ کے لیے اقدامات کر رہی ہے، جبکہ شہر میں صنعتی تنظیموں کو گرانٹس بھی فراہم کی گئی ہیں تاکہ وہ اپنے وسائل سے ترقی کے کام انجام دے سکیں۔ انہوں نے کہا کہ شہر کے مسائل کے حل کے لیے ذہن سازی اور نظام میں آسانی ضروری ہے۔

انہوں نے گیس کی فراہمی کے حوالے سے بھی بات کی اور کہا کہ آئین کی شق 158 کے تحت جس صوبے سے گیس نکلے اس کا پہلا حق اسی کا ہے، تاہم سندھ کے صنعت کاروں کو گیس کی فراہمی میں مشکلات کا سامنا ہے۔ ان کا کہنا تھا کہ اس معاملے پر بات کرنے سے کچھ ادارہ جاتی پیچیدگیاں بھی سامنے آتی ہیں، جنہیں باہمی مشاورت سے حل کرنا ہوگا۔

میئر نے یہ بھی کہا کہ شہر کی ترقی کے لیے جب بھی ضرورت پیش آئے، مقامی کاروباری برادری نے شہر کی قیادت کے ساتھ تعاون کرنا ہے۔ انہوں نے گل پلازہ کی تعمیر نو کے عزم کا اعادہ کیا اور کہا کہ کراچی کو دوبارہ خوفزدہ شہر میں تبدیل نہیں ہونے دیا جائے گا، کیونکہ امن ہی ترقی اور سرمایہ کاری کی ضمانت ہے۔